Севимли Пейгъамберим

ТАКЪДИМ

Эр джанлыны яраткъан, эр мевджутны эр ан варлыкъта тутып тургъан, эписини къоркъудан ве деэшеттен къорчалагъан Аллаh Таалягъа хамд этемиз. Онынъ севимли Пейгъамберине – инсанларнынъ эр джеэттен энъ гузели, энъ яхшысы, энъ усьтюни олгъан Муhаммед алейхисселямгъа, Онынъ ильм, ирфан ве гузель ахлякъ сачкъан Алине, акърабасына ве кене рухларгъа шифа олгъан гузель юзюни корьмекнен, файдалы сёзлерини эшитмекнен шерефленген, бойлеликнен бутюн инсанларнынъ энъ къыйметлилери олгъан Асхабынынъ эписине1 (радыяллаху тааля анхум / Аллаh Тааля олардан разы олсун) ве оларнынъ изинден кеткенлерге де бизден салават (дуа) ве селямлар олсун.

Аллаh Тааля дюньяда бутюн инсанларгъа аджыйып, оларгъа файдалы олгъан шейлерни яратып ёллай. Ахиретте исе О2 джеэннемге кетмеси керек олгъан му’минлерни ихсан этип афу этеджек, дженнетке къавуштыраджакъ. Муhаммед алейхисселям Аллаh Таалянынъ небийи3, ресулы ве хабибидир. Адем огъулларынынъ сейиди (эфендиси)дир. Бойле шерефли бир Пейгъамберге инангъанлар ве Онынъ ёлундан кеткенлер, эльбетте, умметлернинъ энъ яхшылары олдылар.

Дженаб-ы Хакъ мерхамет этип, бизни Онъа уммет этмекнен ниметлерининъ энъ буюгине къавуштырды.4 Онъа табий олмакъ, уймакъ кереклигини ачыкъ бильдирди. Раббимизге бу муаззам нимети ичюн не къадар хамд ве шукюр этсек, аздыр. Аллаh Тааля ич бир шей яратмадан эвель Сервер-и алем (саллаллаху алейхи ве селлем) Эфендимизнинъ мубарек нуруны яратты. Къур’ан-ы Керимде Пейгъамбер Эфендимизге хитап этилип: «Биз сени алемлерге рахмет оларакъ ёлладыкъ» буюрылды. Хадис-и къудсийде5 де: «Сен олмаса эдинъ, сен олмаса эдинъ, махлюкъатны яратмаз эдим» буюрылгъандыр.

Иманнынъ эсас шарты «хубб-и филлях ве бугъд-ы филлях», яни Аллаh Таалянынъ достларыны севмек, душманларыны севмемектир. Бу олмагъан муддетче ич бир ибадет къабул олмай, саибининъ юзюне урула. Шунынъ ичюн «Алемлернинъ Эфендиси»ни севмек бизге фарз олды ве Онынъ мубарек мухаббетини юрегимизге ерлештирмек, гузель ахлякъынен ахлякъланмакъ бизге эмир этильди. Бу мухаббет девам этсин деп, асырлардан берли Пейгъамбер Эфендимизнинъ мубарек аятыны анълаткъан китаплар язылды; бугунь де языла. Даа догърусы, Онынъ мубарек адынен берекетлениле. Биз де бу берекеттен файдаланмакъ ичюн ве Онынъ севгиси юреклеримизге толып-ташсын деп, Эхл-и суннет алимлерининъ китапларындан узун тедкъикъларнен азырлангъан Кяинатнынъ Султаны Ресулуллах Эфендимизнинъ мубарек аятыны окъумагъынъызны тевсие этемиз. Эмеги кечкенлернинъ эписинден Аллаh Тааля разы олсун. Дженаб-ы Хакъ эпимизнинъ юрегини Пейгъамбер Эфендимизнинъ мухаббетинен толдурсын ве бизни Эхл-и суннет алимлери бильдирген догъру ёлда тутсын! Амин.

Доктор Энвер Орен

Кябе-и муаззама ве Месджид-и Харам Мекке-и мукерреме