КИРИШ СЁЗ
Бисмиллаhирраhманирраhим.
Аллаh Таалягъа хамд олсун, берген ниметлери ве яхшылыкълары ичюн сонъсыз шукюрлер олсун… Онынъ севимли Пейгъамберине – инсанларнынъ эр джеэттен энъ гузели, энъ яхшысы, энъ усьтюни олгъан Муhаммед алейхисселямгъа, гузель юзюни корьмек ве файдалы сёзлерини эшитмекнен шерефленген, бойлеликнен бутюн инсанларнынъ энъ къыйметлилери олгъан Асхабынынъ эписине ве оларнынъ изинден кеткенлерге де дуа ве селямлар олсун…
Инсанларны сюслеген, гузеллештирген, оларны севимли ве сайгъылы эткен шей – оларнынъ гузель ахлякъыдыр. Не рутбе, не макъам, не мал, не де башкъа бир шей гузель ахлякънынъ ерини тутып оламаз.
Эй бутюн яратылгъанларнынъ энъ усьтюни! Эй Яраткъаннынъ севгилиси! Эй пейгъамберлернинъ эфендиси, яхшылыкъларнынъ менбасы, инсанларнынъ энъ хайырлысы ве усьтюнликлернинъ къайнагъы олгъан шерефли Пейгъамберимиз! Сени медх этмеге киришмеймиз, язгъанларымызны сенинънен къыйметлендиремиз.
Я Ресулаллах! Медхинъе кучюм ёкътыр,
Эпимиз сенинъ урьметинъе яратылдыкъ.
Муhаммед алейхисселям Аллаh Таалянынъ ресулыдыр. Адем огъулларынынъ сейиди, эфендисидир. Къыямет кунюнде Онъа уйып джеэннемден къуртулгъанларнынъ энъ джумертидир.
Къыямет куню къабирден энъ эвель О турар. Энъ эвель О шефаат этер. Энъ эвель Онынъ шефааты къабул олур. Дженнет къапысыны эвеля О къакъар. Къапы Онъа аман ачылыр. «Лива-и хамд» деген байракъ Онынъ элинде олур. Адем алейхисселям ве онынъ заманындан къыяметке къадар кельген эр му’мин бу байракънынъ тюбюнде олур.
Бир хадис-и шерифте: «Къыямет куню эвель кельгенлернинъ ве сонъ кельгенлернинъ сейидим. Акъикъатны бильдирем, макътанмайым» буюрды. Даа бир хадис-и шерифте исе: «Мен Аллаh Таалянынъ хабибим, севгилисим. Пейгъамберлернинъ реисим. Макътанмакъ ичюн айтмайым.»
Чешит Ислям тиллеринде язылгъан мевлидлернинъ эписинде Пейгъамберимизнинъ анасы ве бабасы тер-темиз олгъанлары язылгъан. Къур’ан-ы Керимден сонъ энъ къыйметли, энъ догъру китап олгъан «Бухарий-и шериф»теки бир хадис-и шерифте Пейгъамберимиз шойле буюрды: «Эр асырда, эр заманда яшагъан инсанларнынъ энъ яхшыларындан, сечильгенлеринден дюньягъа кетирильдим.»
Даима догъру сёйлеген О (алейхиссалату весселям) кене шойле буюрды: «Мен пейгъамберлернинъ (алейхимусселям) энъ сонъкисим, макътанмайым. Мен Абдуллахнынъ огълу Муhаммедим. Аллаh Тааля инсанларны яратты. Мени инсанларнынъ энъ яхшысында яратты. Аллаh Тааля инсанларны фыркъаларгъа айырды. Мени энъ яхшысына ерлештирди. Сонъра бу энъ яхшы фыркъаны къабилелерге айырды. Мени энъ яхшысына ерлештирди. Сонъра бу джемаатны эвлерге айырды. Мени энъ яхшы эвден, яни аиледен дюньягъа кетирди. Инсанларнынъ энъ яхшысым. Энъ яхшы аиледеним. Къыяметте эр кес сускъан вакъытта мен сёйлейджегим. Ич кимсе къыбырдап оламагъан вакъытта оларгъа шефаат этиджим. Ич кимседе умют къалмагъан бир заманда оларгъа мужде бериджим. О кунь эр яхшылыкъ, эр тюрлю ярдым, эр къапынынъ анахтары мендедир. Лива-и хамд меним элимдедир. Инсанларнынъ энъ хайырлысы, энъ джумерти, энъ яхшысым. О кунь эмримде бинълердже хызметчи бардыр. Къыямет куню пейгъамберлернинъ имамы, хатиби ве эписине шефаат этиджи – мен. Буларны макътанмакъ ичюн айтмайым. Акъикъатны бильдирем. Акъикъатны бильдирмек меним вазифемдир. Буларны айтмасам, вазифемни япмагъан олурым.»
О (алейхиссалату весселям) олмаса эди, Аллаh Тааля ич бир шей яратмаз эди, Онынъ Рабб олгъаны, мабуд (Онъа ибадет этильген Зат) олгъаны мейдангъа чыкъмаз эди. Адем алейхисселям сувнен топракъ арасында экенде, яни чамуры йогъурылгъанда, О алейхисселям пейгъамбер эди.
Муhаммед алейхисселям Аллаh Таалянынъ махбубы олгъаны ичюн, Онынъ изинден кеткен киши де махбублыкъ дереджесине котериле. Чюнки мухиб, яни севген киши, севгилисининъ ахлякъыны, аляметлерини кимде корьсе, оны да север.
Бутюн инсаниетнинъ сейиди, энъ усьтюни олгъан бойле бир Пейгъамберге инангъан, Онынъ ёлундан кеткен киши, эльбетте, умметлернинъ энъ яхшысы олур. Ал-и Имран суресининъ «Сиз умметлернинъ, дин саиплерининъ энъ хайырлысы, энъ яхшысысынъыз!» манасындаки юз онунджы аети булар ичюн муждедир. Онъа инанмагъан, Оны анълап оламагъан, озьлерине бенъзеткен кимселер инсанларнынъ энъ фенасыдыр. Тёвбе суресининъ «Ваший, юреклери къатты джаиллер санъа инанмаз. Олар нифакъта даа шиддетлидирлер» манасындаки докъсан единджи аети оларны косьтере. Дюньянынъ бугуньки алында Онынъ суннет-и сенийесине, яни Ислямиетке уймакънен шерефленгенлер не къадар бахтлыдыр!
Дженаб-ы Хакъ Ниса суресининъ сексенинджи аетинде Муhаммед алейхисселямгъа итаат этмек Озюне итаат этмек олгъаныны бильдире. Меален: «Ресулгъа итаат эткен, Аллаh Таалягъа итаат эткен олур» буюрылгъандыр. Хашр суресининъ единджи аетинде меален: «Ресулымнынъ кетиргенлерини алынъыз ве ясакъ эткенлеринден къачынъыз!» буюрылды. Бу ает-и кериме Ислямиетке уймакънынъ лязым олгъаныны косьтере. Аллаh Тааля Къалем суресининъ дёртюнджи аетинде меален: «Шубесиз ки, сен хулукъ-ы азим узериндесинъ» (Къалем суреси, 68/4) ве «Ресулуллахта сиз ичюн [уймакъ керек олгъан] гузель орьнеклер бардыр» (Аhзаб суреси, 33/21) буюрды.
Дженаб-ы Хакъ мерхамет этип, бизни Онъа уммет этмекнен ниметлернинъ энъ буюгине къавуштырды. Онъа табий олмакъ, уймакъ кереклигини ачыкъ бильдирди. Юдже Раббимизге бу муаззам нимети ичюн не къадар хамд ве шукюр этсек, аздыр.
Бу эсер бутюн инсаниет ичюн акъикъий рехбер олгъан севимли Пейгъамберимиз Муhаммед алейхисселямнынъ аятыны, гузель ахлякъыны, муджизелерини, фазилетлерини анълата, Онъа уймакъ дин ве дюнья сеадети ичюн энъ муим бир вазифе олгъаныны бильдире.
Озюмизге, аилемизге, ватанымызгъа, миллетимизге файдалы инсанлар олмакъ истесек, Муhаммед алейхисселямгъа уяйыкъ. Уяйыкъ ки, эм бу дюньяда, эм де о бири дюньяда раат ве бахтлы олайыкъ.
Хакъ Тааля эпимизнинъ юрегини севимли Пейгъамберимиз Муhаммед алейхисселямнынъ мухаббетинен толдурсын ве бизни Эхл-и суннет алимлери бильдирген догъру ёлда тутсын! Амин!
Профессор доктор Рамазан Айваллы
