உலகத்தை அவர் கௌரவித்தல் (அவரது பிறப்பு)

எனது உம்மத், எனது உம்மத்

தாய்மார்களில் மிக உயர்ந்த கௌரவத்தைப் பெற்ற, தாய்மார்களில் மிகவும் அதிர்ஷ்டசாலி, தனது கர்ப்பத்தைப் பற்றி விவரிக்கிறார், "நான் அவரை சுமந்து, கர்ப்பமாக இருந்தபோது எந்தப் பிரச்சினையையும் அல்லது வலியையும் அனுபவித்ததில்லை. நான் கர்ப்பமாக இருப்பதைக் கூட உணரவில்லை. எனது கர்ப்பத்தின் ஆறாவது மாதத்தின் பிறகு, தூக்கத்திற்கும் விழிப்புணர்வுக்கும் இடையில், ஒருவர் என்னிடம், "நீங்கள் யாரைக் கர்ப்பமாக சுமந்திருக்கின்றீர் தெரியுமா?" எனக் கேட்டார். "எனக்குத் தெரியாது" என்று நான் சொன்னபோது, அவர், "நினைவில் கொள்ளுங்கள், நீங்கள் இறுதி நபியைக் கர்ப்பமாக சுமந்திருக்கின்றீர்!" என்று சொன்னார். (பிரசவத்தின்) நேரம் நெருங்கியபோது, அதே நபர் மீண்டும் வந்து, "ஆமினாவே! குழந்தை பிறக்கும் போது, அவருக்கு முஹம்மத் என்று பெயரிடுங்கள்." என்று கூறினார். (இன்னொரு அறிவிப்பின் படி) "குழந்தை பிறந்ததும் அவருக்கு அஹ்மத் என்று பெயரிடுங்கள்!" என்று கூறினார்."

அன்னை ஹஸ்ரத் ஆமினா பின்வருமாறு பிரசவத்தின் தருணத்தை விவரிக்கிறார்:

"பிரசவ நேரம் வந்தபோது, நான் ஒரு பயங்கரமான சத்தத்தைக் கேட்டேன். நான் நடுங்க ஆரம்பித்தேன். பின்னர் நான் ஒரு வெள்ளை பறவையைப் பார்த்தேன். அது வந்து என்னை அதன் இறக்கைகள் மூலம் அணைத்துக் கொண்டது. அப்போது எல்லாப் பயமும் நடுக்கமும் மறைந்து போயின. நான் எரிவது போன்று மிகவும் தாகமாக உணர்ந்தேன். அப்போது எனக்குப் பக்கத்தில், பால் போன்ற ஒரு வெள்ளை சர்பத் கிண்ணத்தைப் பார்த்தேன். அவர்கள் எனக்குக் குடிக்க சர்பத்தை கொடுத்தார்கள். நான் அதைக் குடித்தேன். அது குளிர்ந்தது, தேனைப்பார்க்கிலும் இனித்தது. என் தாகம் தீர்ந்துவிட்டது. பின்னர் நான் ஒரு பெரிய நூரைப் பார்த்தேன்; அதனால் என் வீடு மிகவும் பிரகாசமாகியது. என்னால் அந்த நூரைத் தவிர வேறு எதையும் பார்க்க முடியவில்லை.

The Location of the House Where Our Prophet Was Born (Currently used as the Mecca Library)

நீங்கள் நெருப்பிலிருந்து தப்பிக்க விரும்பினால்,
அன்புடனும் ஆர்வத்துடனும் ஸலாத் சொல்லுங்கள்.
அஸ்ஸலாத்து வஸ்ஸலாமு அலைக்க, யா ரஸூலுல்லாஹ்!
அஸ்ஸலாத்து வஸ்ஸலாமு அலைக்க, யா ஹபீபல்லாஹ்!
அஸ்ஸலாத்து வஸ்ஸலாமு அலைக்க, யா நூர் அல்-அர்ஷில்லாஹ்

நபியவர்கள் பிறந்த வீடானது அவரின் பாட்டனின் பாட்டன் ஹாஷிம் இப்னு அப்துல் மனாஃப் என்பவருக்கு சொந்தமானது. இது கஃபாவின் வடகிழக்கில் 300-400 மீட்டர் தொலைவில் இருந்தது. எமது இறைதூதர் ஸல்லல்லாஹு அலைஹி வஸல்லம் அவர்கள் ஹிஜ்ராவின் போது இந்த அருள்பாளிக்கப்பட்ட வீட்டை அகில் இப்னு அபீ தாலிபுக்கு ஒப்படைத்தார்கள். அகிலின் பேரக்குழந்தைகள் அதை முஹம்மத் இப்னு யூஸுஃப் அஸ்-ஸகஃபிக்கு விற்றனர்.

பின்னர், இந்த அருள்பாளிக்கப்பட்ட வீட்டை ஹாரூன் ரஷீத்தின் தாயார் அன்னை ஹைஸூரான் வாங்கி மஸ்ஜிதாக மாற்றினார். அப்பாஸிய மற்றும் மம்லுக் ஸுல்தான்களால் பாதுகாக்கப்பட்ட இந்த மஸ்ஜித், உஸ்மானியர்களின் காலத்திலும் பாதுகாக்கப்பட்டது. பெருஞ் சிறப்புப்பெற்ற ஸுலைமான் மஸ்ஜிதை மீண்டும் கட்டியெழுப்பினார்.

வரலாறு முழுவதும், இந்த மஸ்ஜித் பல முறை புதுப்பிக்கப்பட்டது. 1924 இல், சவுதிகள் மக்கா மீது படையெடுத்தபோது, ​​அவர்கள் இந்த மஸ்ஜிதை இடித்தார்கள். 1950 ஆம் ஆண்டில் ஷெய்க் அப்பாஸ் கட்டான் கட்டிய இந்த வீடு, 1959 முதல் மக்கா பொது நூலகமாக பயன்படுத்தப்படுகிறது. ஆனால் வஹ்ஹாபி அரசாங்கம் இதைக் கூட பொறுத்துக்கொள்ள முடியாது, இந்த நூலகக் கட்டிடத்தை அடுத்த ஆண்டுகளில் இடித்துவிடத் திட்டமிட்டுள்ளது.

"கியாமத் நாளில், எல்லோரும் அமைதியாக இருக்கும்போது, நான் பேசுவேன். யாராலும் நகர முடியாதபோது, நான் அவர்களுக்காகப் பரிந்து பேசுவேன்."
ஹதீஸ் அஷ்-ஷரீஃப்

இதற்கிடையில், என்னைச் சூழ்ந்து கொண்டு எனக்குப் பணிவிடை புரியும் பல பெண்களைப் பார்த்தேன். அவர்கள் உயரமானவர்களாக இருந்தனர். அவர்களது முகங்கள் சூரியனைப் போல பிரகாசித்தன. அவர்கள் அப்துல் மனாஃப் கோத்திரத்தைச் சேர்ந்த பெண்களைப் போல் இருந்தனர். அவர்கள் திடீரெனத் தோன்றியதால் நான் வியப்படைந்தேன். அவர்களில் ஒருவர், "நான் பிர்அவ்னின் மனைவியான ஆஸியா" என்றார். மற்றவர், "நான் மர்யம் பின்த் இம்ரான், இவர்கள் ஜன்னத்தின் ஹூரிகள்."2 எனச் சொன்னார்.

அதே சமயம், வானத்திலிருந்து தரை வரை நீண்டுள்ள வெள்ளை நிறப் பட்டுத் துணியை நான் பார்த்தேன். "அவரை மக்களின் கண்களிலிருந்து மறைத்து விடுங்கள்" என்று கூறப்பட்டது. அந்த நேரத்தில், ஒரு பறவை கூட்டம் தோன்றியது. அவற்றின் வாய்கள் மரகதம் போலவும், இறக்கைகள் ரத்தினம் போலவும் இருந்தன. பயத்தில் எனக்கு வியர்த்தது. என் வியர்வைத் துளிகள் கஸ்தூரியின் வாசனையை அறை முழுவதும் பரப்பியது. அந்த நேரத்தில், அவர்கள் என் கண்களிலிருந்து திரைச்சீலைகளை அகற்றினர். நான் கிழக்கிலிருந்து மேற்கு நோக்கி பூமியைப் பார்த்தேன். வானவர்கள் என்னைச் சூழ்ந்திருந்தனர்.

முஹம்மத் அலைஹிஸ்ஸலாம் பிறந்தவுடன், அவர் தனது தலையை ஸஜ்தாவில் வைத்து ஆள்காட்டி விரலை உயர்த்தினார். அப்போது, ​​வானத்திலிருந்து ஒரு வெள்ளை மேகம் இறங்கி வந்து அவரைச் சூழ்ந்து கொண்டது. அந்நேரம் நான் பின்வருமாறு சொல்லும் ஒரு குரலை செவிமடுத்தேன்: "மேற்கிலிருந்து கிழக்கு வரை எல்லா இடங்களிலும் அவரைச் சுற்றிக் காட்டுங்கள். முழு பிரபஞ்சமும் அவரை அவரது பெயர், உடல் மற்றும் பண்புடன் பார்க்கும் வகையில் அவரைச் சுற்றிக் காட்டுங்கள். அல்லாஹ்வின் பெயர் 'மாஹி' என்பதை அவர்களுக்குத் தெரியப்படுத்துங்கள், அதாவது அல்லாஹு தஆலா தன்னுடன் இணைவைக்கப்படும் ஷிர்க்கின் அனைத்து அறிகுறிகளையும் (மற்றவர்களை அல்லாஹ்வுக்கு இணையாக வைப்பவற்றை) நீக்குகிறான்." அந்த மேகமும் மறைந்தது. நான் முஹம்மத் (ஸல்லல்லாஹு அலைஹி வஸல்லம்) ஒரு வெள்ளைக் கம்பளித் துணியால் மூடப்பட்டிருப்பதைக் கண்டேன். அப்போது, ​​சூரியனைப் போல பிரகாசித்த முகத்துடன் மூன்று பேர் தோன்றினர். ஒருவர் வெள்ளிப் பாத்திரத்தையும், ஒருவர் மரகதத் தொட்டியையும், ஒருவர் பட்டுத் துணியையும் வைத்திருந்தார். அது மதுரத்தில் இருந்து கஸ்தூரி சொட்டுவது போல் இருந்தது. அவர்கள் அந்தத் தொட்டியில் என் அருள்பாளிக்கப்பட்ட மகனை வைத்து. அவருடைய தலை, கால்களைக் கழுவியபின், அவரைப் பட்டுத் துணியால் மூடினார்கள். பின்பு அவர்கள் அவருடைய அருள்பாளிக்கப்பட்ட தலையில் வாசனைத் திரவியம் தடவி, அவருடைய அருள்பாளிக்கப்பட்ட கண்களில் கண் மைப்பொடி பூசிவிட்டு, மறைந்தார்கள்.

வானத்திலிருந்து வரிசையாக, வானவர்கள் இறங்கி வந்தனர்.
என் வீடு கஃபா என்பது போல், அவர்கள் அதனைச் சுற்றி வந்தனர். 
ஜன்னத்தின் ஹூரிகள் குழுக்களாக நுழைந்தனர்,
அவர்களின் முகங்களின் நூரால் என் வீடு ஒளிர்ந்தது.
வெளியில் ஒரு படுக்கை விரிப்பு போடப்பட்டது.
அதனை விரித்த வானவர் அதற்கு சுந்துஸ் என்று பெயரிட்டார்.
இவை அனைத்தையும் நான் தெளிவாகக் கண்டதால்,
நான் மிகவும் வியப்படைந்தேன்.
திடீரென சுவர் பிரிக்கப்பட்டு, ஜன்னாவிலிருந்து மூன்று ஹூரிகள் தோன்றினர்.
அந்த மூன்று அழகிகளில் ஒருவர் ஒளிமயமான ஆஸியா என்று சிலர் கூறுகிறார்கள்.
அன்னை மர்யம் அவர்களில் ஒருவர்,
மற்றவர், ஜன்னாவைச் சேர்ந்த ஹூரி, அவர் அழகான தோற்றத்தில் இருந்தார்.
அந்த மூவரும் அருளுடன் வந்தனர்.
பின்னர் என்னை மூவரும் ஒரே நேரத்தில் வாழ்த்தினர்.
என்னைச் சுற்றி, அவர்கள் அமர்ந்திருந்தனர்.
முஸ்தபாவின் நற்செய்தியை அவர்கள் எனக்குக் கூறினர்.

முஹம்மத் அலைஹிஸ்ஸலாம் பிறந்தபோது, ​​அப்துர்ரஹ்மான் இப்னு அவ்ஃப்பின் தாயாரான அன்னை ஷிஃபா, உஸ்மான் இப்னு அபில் ஆஸின் தாயார் அன்னை பாத்திமா மற்றும் எமது நபியின் மாமி அன்னை ஸபிய்யா ஆகியோர் அன்னை ஆமினாவுடன் இருந்தார். அவர்கள் நூர் பற்றியும் அவர்கள் கண்ட மற்ற நிகழ்வுகளைப் பற்றியும் குறிப்பிட்டுள்ளனர்:

அன்னை ஷிஃபா இவ்வாறு விவரிக்கிறார், “அன்றிரவு நான் ஆமினாவுடன் உதவியாளராக இருந்தேன். முஹம்மது அலைஹிஸ்ஸலாம் அவர்கள் இவ்வுலகிற்கு வந்தவுடனேயே அவர் பிரார்த்தனை செய்வதையும் மன்றாடுவதையும் நான் கேட்டேன். "யர்ஹமுக ரப்குக" என்று மறைவான குரல் ஒலித்தது. அப்போது கிழக்கிலிருந்து மேற்கு வரை எல்லா இடங்களிலும் காணக்கூடிய அளவுக்கு ஒரு நூர் தோன்றியது."

மேலும் பல சம்பவங்களை நேரில் கண்ட அன்னை ஷிஃபா, "அவர் நபி என்று அறிவிக்கப்பட்டவுடன், நான் இஸ்லாத்தை முதலில் நம்பியவர்களில் ஒருவனாக இருந்தேன்." எனக் குறிப்பிட்டுள்ளார்.

“கியாமத் நாளில், நான் அனைத்து நபிமார்களுக்கும் இமாம், ஹாதிப் மற்றும் பரிந்துரை செய்பவராக இருப்பேன். இதை நான் பெருமைக்காக சொல்லவில்லை."
ஹதீஸ் அஷ்-ஷரீஃப்

படைப்பினங்கள் எல்லாம் களிகூர்ந்தன,
துக்கம் போய்விட்டது, உலகம் உயிர்த்தெழுந்தது.
உலகின் அனைத்துத் துகள்களும் ஏங்கின;
அவை விளித்து வாழ்த்துக்களைத் தெரிவித்தன.
வாழ்த்துக்கள்! மகத்தான சுல்தானே, வாழ்த்துக்கள்,
வாழ்த்துக்கள்! ஞானத்தின் ஆதாரமே, வாழ்த்துக்கள்.
வாழ்த்துக்கள்! குர்ஆனின் ரகசியமே, வாழ்த்துக்கள்,
வாழ்த்துக்கள், துன்பங்களின் நிவாரணியே, வாழ்த்துக்கள்.
அழகுத் தோட்டத்தின் இராப்பாடிப் பறைவே வாழ்த்துக்கள்,
மாட்சிமை உடையவனுக்கு நெருக்கமானவரே, வாழ்த்துக்கள்.
ஹக்கின் - சத்திய சந்திரனே, சூரியனே, வாழ்த்துக்கள்,
ஹக்- சத்தியத்திலிருந்து விலகி இருக்காதவரே, வாழ்த்துக்கள்!
உம்மத்தின் பாவிகளின் புகலிடமே, வாழ்த்துகள்,
ஆதரவற்றவர்களின் புகலிடமே, வாழ்த்துக்கள்.
ஃகலீலின் அன்புக்குரியவரே, வாழ்த்துக்கள்!
ஜலீலின் உண்மையான ஹபீபே, வாழ்த்துக்கள்.
உலக இரக்கமே, வாழ்த்துக்கள்,
பாவிகளின் பரிந்துரையாளரே, உமக்கு வாழ்த்துக்கள்.
இரு உலகங்களின் பாதுஷாவே, வாழ்த்துக்கள்!
உமக்காகவே, உலகம் படைக்கப்பட்டது...

அன்னை ஸஃபிய்யா பின்வருமாறு விவரிக்கிறார்; “முஹம்மத் அலைஹிஸ்ஸலாம் பிறந்தபோது, ​​ஒரு நூர் எங்கும் நிறைந்திருந்தது. அவர் உலகிற்கு வந்தவுடன், அவர் ஸஜ்தா செய்து, பின்னர் தனது தலையை உயர்த்தி, 'லா இலாஹ இல்லல்லாஹ், இன்னீ ரஸுலுல்லாஹ்' என்று தெளிவாகக் கூறினார். நான் அவரைக் கழுவ நினைத்தபோது, ​​"நாம் அவரைக் கழுவி அனுப்பியுள்ளோம்" என்று ஒரு குரல் கேட்டது. அவர் விருத்தசேதனம் செய்யப்பட்டவராகக் காணப்பட்டார். அவருடைய தொப்புள் கொடி வெட்டப்பட்டிருந்தது. அவர் பிறந்த உடனேயே ஸஜ்தா செய்தார். அப்போது மெல்லிய குரலில் ஏதோ சொல்லிக் கொண்டிருந்தார். நான் எனது காதுகளை அவருடைய அருள்மிகு வாயின் அருகில் வைத்தேன்; அவர், "உம்மதீ, உம்மதீ! "என் சமுதாயமே! என் சமுதாயமே!" என்று சொன்னார்.3

அந்த ரஸூல் கஅபாவை நோக்கி,
முகத்தை தரையில் வைத்து, ஸஜ்தா செய்தார்.
அவர் தலையை ஸஜ்தாவில் வைத்து, ஒரு விரலை உயர்த்தி,
அல்லாஹ்வைப் புகழ்ந்து, அவனது ஏகத்துவத்தை ஓதினார்.
அவர் கூறுகிறார், யா மவ்லா, நான் என் முகத்தை உன் பக்கம் திருப்புகிறேன்,
யா இலாஹீ, நான் உன்னிடம் என் உம்மத்திற்காகக் கேட்கிறேன்.
அவர் ஹக்கின் உதவிக்காகக் காத்திருந்தார்,
என் உம்மத், என் உம்மத்! என்றே ஓதினார்.

எமது அன்பார்ந்த நபி பிறந்தபோது, ​​​​அவரது பாட்டன் அப்துல்முத்தலிப் கஃபா அஷ்-ஷரீப்பின் அருகில் அல்லாஹு தஆலாவிடம் பிரார்த்தனை செய்து கொண்டிருந்தார். இவ்வாறாக அவர் நற்செய்தியைப் பெற்றார்:

திடீரென்று, அவர் கஃபாவின் மகாம் அல்-இப்ராஹீமை நோக்கி ஸஜ்தா செய்தார், பின்னர் இயல்பு நிலைக்குத் திரும்பினார். அப்துல்முத்தலிப் கஃபா பின்வருமாறு பேசுவதைத் தெளிவாகக் கேட்டார், “அல்லாஹு அக்பர்! முஹம்மத் ஸல்லல்லாஹு அலைஹி வஸல்லம் அவர்களின் குரல் என்னை சிலைகளிலிருந்து விடுவிக்கும்." அந்த நேரத்தில், ஹூபெல் சிலையின் முகம் கீழே விழுந்தது. அப்போது ஒரு சப்தம் வந்தது. "ஆமினா ஓர் ஆண் குழந்தையைப் பெற்றெடுத்துள்ளார். முஹம்மத் ஸல்லல்லாஹு அலைஹி வஸல்லம் மக்களை மதவெறியின் இருளிலிருந்து விசுவாசத்தின் வெளிச்சத்திற்கு அழைத்துச் செல்வார். ஹக் தஆலா அவரை மனிதர்களுக்கும் ஜின்களுக்கும் நபியாக அனுப்பியுள்ளான். பொக்கிஷங்களின் திறவுகோல்கள் அவரிடமே இருக்கின்றன. அவருடைய பிறந்த நாளை மறந்து விடாதீர்கள்; மறுமை நாள் வரை இந்த நாளை உங்களுக்குப் பரிசுத்தமானதாக ஆக்கிக் கொள்ளுங்கள்." அப்துல் முத்தலிப் இந்த வார்த்தைகளைக் கேட்டபோது, அவர் அதிர்ச்சியால் பேச முடியாமல் போனார். அவர் தன் மார்பில் கையை வைத்து, "நான் கனவு காண்கிறேனா?" எனத் தன்னிடமே கேட்டுக் கொண்டார். ஆனால் அவர் மற்றொரு ஓசையைக் கேட்டார், "குறைஷிகளின் தலைவரே, உங்களை பயமுறுத்துவது என்ன?" என்று அவரிடம் கேட்கப்பட்டது. அவருக்கு பதில் சொல்லும் வலிமை இருக்கவில்லை.

அவர் ஆமினாவின் வீட்டை நெருங்கியபோது, ​​கூரையில் ஒரு பறவை இருப்பதைக் கண்டார். அது வீட்டின் மீது தனது இறக்கைகளை விரித்திருந்தது. மக்காவின் மலைகள் அதன் நூரால் பிரகாசித்தன. ஒரு வெள்ளை மேகம் வீட்டை நிழலாடியது. கதவின் முன் நின்ற இரண்டு வானவர்கள் அவரை உள்ளே நுழைய விடவில்லை. "என்ன நடக்கிறது, நான் கனவு காண்கிறேனா" என்று அவர் யோசித்துக் கொண்டிருந்தபோது, உள்ளே இருந்து வந்த கஸ்தூரி வாசனை அவரைத் தாக்கியது.

முஹம்மத் அலைஹிஸ்ஸலாம் பிறந்த நாளில், அப்துல் முத்தலிப் அற்புதமான பல விஷயங்களைக் கண்டு, "என் மகனின் மகிமையும் புகழும் மிகப் பெரியதாக இருக்கும்" என்று கூறினார்.4

அப்துல் முத்தலிப், இந்த மகத்தான மகிழ்ச்சியைக் கொண்டாட, பிறந்த ஏழாவது நாளிலிருந்து மூன்று நாட்களுக்கு மக்கா மக்களுக்கு விருந்து வைத்தார். அவர் நகரத்தின் அனைத்துப் பகுதிகளிலும் மனிதர்களினதும் விலங்குகளினதும் பயன்பாட்டிற்காக ஒட்டகங்களைப் பலியிட்டார்.5 விருந்தில், அவர் தனது பேரனுக்கு என்ன பெயர் வைத்தார் என்று மக்கள் கேட்டபோது, ​​​​"நான் அவருக்கு 'முஹம்மத்' (ஸல்-அல்லாஹு அலைஹி வஸல்லம்) என்று பெயர் வைத்துள்ளேன்” என்று கூறினார். அவருடைய மூதாதையரின் பெயரை ஏன் வைக்கவில்லை என்று மக்கள் அவரிடம் கேட்டதற்கு, அவர், "அல்லாஹு தஆலாவும் மக்களும் அவரைப் புகழ்ந்து உயர்த்த வேண்டும் என்பதற்காகவே நான் இதைச் செய்தேன்."6 எனப் பதிலளித்தார். மற்றொரு அறிவிப்பில், 'முஹம்மத்' என்று பெயர் வைத்தவர் அன்னை ஆமினா என்று வந்துள்ளது.

பௌர்ணமி சந்திரனைப் போன்ற முகத்தை உடையவரே,
வீழ்ந்த அனைவருக்கும் நீங்கள்தான் தங்குமிடம்.
இதயத்தின் துக்கத்திற்கான மருந்தே,
நீங்கள்தான் படைக்கப்பட்ட அனைத்திற்கும் சுல்தான்.
நீங்கள் அனைத்து நபிமார்களுக்கும் சுல்தான்,
நீங்கள்தான் அவ்லியா மற்றும் அஸ்ஃபியாவின் கண்களின் நூர்.
நபித்துவ அரியணையின் கடைசி நபியே!
நபித்துவத்தின் கடைசி முத்திரையே!
உமது வெளிச்சம் உலகத்தை ஒளிரச் செய்தது போல,
உமது ரோஜாவைப் போன்ற முகம் அதனை ரோஜாத் தோட்டமாக மாற்றியது.
அஞ்ஞான இருள் அழிந்தது,
அறிவுத் தோட்டம் முதிர்ச்சியடைந்தது. 
ஹபீபல்லாஹ்வே, எங்களுக்கு உதவுங்கள்,
எங்கள் வாழ்வின் முடிவில் உம்மைக் காண்பதன் மூலம்
எம்மை மகிழ்ச்சியடையச் செய்யுங்கள்.

ரஸூலுல்லாஹ் பிறந்த இரவில் நடந்த முக்கியமான நிகழ்வுகள்

“எல்லாக் காலங்களிலும் எல்லா மக்களிலும் மிகச் சிறந்தவர்கள் மூலமாக நான் பூமிக்குக் கொண்டுவரப்பட்டேன்.”
ஹதீஸ் அஷ்-ஷரீஃப்

ரஸூல் அல்-அக்ரம் (ஸல்-அல்லாஹு அலைஹி வஸல்லம்) அவர்கள் உலகத்தை கௌரவிக்கும் பல அறிகுறிகள் அவரது பிறப்புக்கு முன்னும் பின்னும் நிகழ்ந்தன. எமது தலைவர் நபிகள் நாயகம் உலகிற்கு வருவதற்கு முன்பே அக்கால பிரபலமான மனிதர்கள் கனவு கண்டுள்ளனர். அவர்கள் தங்கள் கனவுகளுக்கு அக்கால சோதிடர்கள் மற்றும் பிரபல அறிஞர்களிடம் விளக்கம் கேட்டபோது, ​​அந்தக் கனவுகள் முஹம்மத் அலைஹிஸ்ஸலாமின் வருகையை சுட்டிக் காட்டுவதாகக் கூறினார்கள்.

எமது அன்பார்ந்த நபியவர்களின் பாட்டன் அப்துல் முத்தலிப் இவ்வாறு கூறினார்: "ஒருமுறை நான் தூங்கிக் கொண்டிருந்தேன். நான் என் கனவிலிருந்து பெரும் பதட்டத்துடன் விழித்தேன். நான் ஒரு சோதிடரிடம் சென்று விளக்கம் பெற விரும்பினேன். நான் அவருடைய இடத்தைச் சென்றடைந்ததும், அவர் என் முகத்தைப் பார்த்து, "குரைஷிகளின் தலைவரே! உமக்கு என்ன நேர்ந்தது? உமது முகத்தில் ஒரு விசித்திரமான வெளிப்பாடு உள்ளது. ஏதாவது முக்கியமான விஷயம் நடந்ததா?" என்று வினவினார். நான், "ஆமாம், இதுவரை யாரிடமும் சொல்லாத ஒரு பயங்கரக் கனவைக் கண்டேன்" என்று சொல்லிவிட்டு, அவர் அருகில் அமர்ந்து அந்தக் கனவைச் சொல்ல ஆரம்பித்தேன்:

"இன்றிரவு என் கனவில் ஒரு பெரிய மரம் தோன்றியது. அதன் கிளைகள் கிழக்கிலும் மேற்கிலும் பரவியிருந்தன. அந்த மரத்தின் அருகில் சூரியன் மிகவும் மங்கலாகத் தோன்றும் அளவுக்கு அந்த மரம் வெளிச்சத்தை வெளிப்படுத்தியது. அந்த வெளிச்சம் தோன்றி மறைந்தது. மக்கள் அதை நோக்கிச் சென்று கொண்டிருந்தனர். ஒவ்வொரு நொடியும் அதன் நூர் - ஒளி அதிகரித்துக் கொண்டே சென்றது. குரைஷ் கோத்திரத்தினர் சிலர் அதன் கிளைகளில் ஒட்டிக்கொண்டிருந்தனர். அவர்களில் சிலர் மரத்தை வெட்ட முயன்றனர். அதை வெட்ட நினைத்தவர்களை ஒரு இளைஞர் தடுத்துக் கொண்டிருந்தார். அவர் மிகவும் அழகான முகத்தைக் கொண்டிருந்தார்; அத்தகைய அழகை நான் இதற்கு முன் பார்த்ததில்லை. அத்துடன், அவரது உடலில் இருந்து அழகான நறுமணம் வீசியது. மரத்தின் கிளைகளில் ஒன்றைப் பிடிக்க நான் கையை நீட்டினேன், ஆனால் என்னால் அதை அடைய முடியவில்லை."

நான் என் வார்த்தைகளை முடித்தபோது, ​அந்த சோதிடரின் முகம் மாறிவிட்டது. அவர் மஞ்சள் நிறமாக மாறிவிட்டார். அப்போது, ​​"உனக்கு இதில் பங்கு இல்லை" என்றார். நான், யாருக்குப் பங்கு என்று கேட்டேன். "மரத்தின் கிளைகளை பிடித்துக்கொண்டிருந்தவர்களுக்கு" என்று அவர் கூறினார். அத்துடன், "உங்கள் சந்ததியினரிலிருந்து ஒரு நபி வருவார்; அவர் எல்லா இடங்களையும் ஆட்சி செய்வார். மக்கள் அவரது மதத்தை ஏற்றுக்கொள்வார்கள்" என்றார். பின்னர் அவர் என்னுடன் இருந்த என் மகன் அபூதாலிப் பக்கம் திரும்பி, "இவர் அவருடைய தந்தைவழி மாமாவாக இருக்க வேண்டும்" என்று கூறினார்."

பிற்காலத்தில் நபித்துவம் அறிவிக்கப்பட்ட சந்தர்ப்பத்தில் அபூதாலிப் இந்த நிகழ்வை எமது தலைவரான நபியவர்களிடம் கூறி, “அந்த மரம் அபுல் காஸிம், அல்-அமீன் முஹம்மத் அலைஹிஸ்ஸலாம்." என்று கூறினார்.

எமது அன்பார்ந்த நபிகள் நாயகம் முஹம்மத் அலைஹிஸ்ஸலாம் அவர்கள் உலகை கௌரவித்த இரவில், வானத்தில் ஒரு புதிய நட்சத்திரம் தோன்றியது. இதைக் கண்ட யூத அறிஞர்கள் முஹம்மத் அலைஹிஸ்ஸலாம் பிறந்து விட்டார் என்பதைப் புரிந்து கொண்டனர்.

அஸ்ஹாப் அல்-கிராம்களில் ஒருவரான ஹஸ்ஸான் இப்னு தாபித் கூறுகிறார், “எனக்கு எட்டு வயது இருக்கும் போது, ஒரு நாள் காலையில், ஒரு யூதர் ஓடி வந்து, "யூதர்களே!" என்று கூச்சலிட்டார். யூதர்கள் அவரைச் சூழ்ந்து கொண்டு, அவர் கூச்சலிட்டதற்கான காரணத்தைக் கேட்டார்கள். அதற்கு அவர், "இன்றிரவு அஹ்மதின் நட்சத்திரம் தோன்றியதை அறிந்து கொள்ளுங்கள்! அஹ்மத் இன்றிரவு இந்த உலகத்திற்கு வந்து விட்டார்." என்று பதிலளித்தார்.

ரஸூலுல்லாஹ் (ஸல்) பிறந்த இரவில், கஃபாவில் இருந்த அனைத்து சிலைகளும் குப்புறமாகக் கீழே விழுந்தன.

உர்வத்துப்னுஸ்-ஸுபைர் பின்வருமாறு விவரிக்கிறார்: “குறைஷைச் சேர்ந்த ஒரு குழுவினர் ஒரு சிலையை வைத்திருந்தனர். வருடத்திற்கு ஒருமுறை, அவர்கள் அதைச் சுற்றி (தவாஃப்) வலம் வந்து, ஒட்டகங்களைப் பலியிட்டு, திராட்சை மது அருந்துவார்கள். அவ்வாறான ஒரு நாளில் அவர்கள் அந்த சிலையிடம் சென்றபோது, அது தரையில் முகங்குப்புற விழுந்து கிடப்பதைக் கண்டனர். அவர்கள் அதைத் தூக்கினர், அது மீண்டும் விழுந்தது. இவ்வாறு மூன்று முறை மீண்டும் மீண்டும் நிகழ்ந்தது. அவர்கள் அதைத் தூக்கி நிறுத்தினபோது, ஒரு சத்தம் உண்டாயிற்று; ஒருவர் பிறந்து விட்டார், அதனால் முழு பூமியும் அதிர்ந்தது. எல்லா சிலைகளும் கீழே விழுந்து விட்டன. அரசர்களின் இதயங்கள் பயத்தால் நடுங்கின!" என்ற வார்த்தைகளை அவர்கள் கேட்டனர். இந்த சம்பவம் முஹம்மத் அலைஹிஸ்ஸலாம் பிறந்த இரவில்தான் நிகழ்ந்துள்ளது.

மதாயின் நகரில் இருந்த பாரசீக ஆட்சியாளரின் அரண்மனையின் பதினான்கு கோபுரங்கள் இடிந்து விழுந்தன. ஒரு பயங்கரமான சத்தத்தின் காரணமாக பயத்துடன் விழித்தெழுந்த ஆட்சியாளரும் அவரது மக்களும், அவர்களின் குறிப்பிடத்தக்க பயங்கரமான கனவுகளை விளக்கினர். இது ஒரு பெரிய நிகழ்வின் அடையாளம் என்பது அப்போது புரிந்து கொள்ளப்பட்டது.

மிகவும் புகழ்பெற்ற சோதிடர்கள் அந்தக் கனவுகளை விளக்கினர். டமஸ்கஸ், ஈராக், ஈரான், தைக்ரிஸ் மற்றும் யூப்ரடீஸ் ஆகியவை இஸ்லாமிய ஆதிக்கத்தின் கீழ் வரும் என்பதை அக்கனவுகள் தெரிவிப்பதாக அவர்கள் விளக்கமளித்தனர்.

"என்னைப் புகழ்வது (மவ்லித் மற்றும் இலாஹீ ஓதுதல்) ஒரு இபாதத் ஆகும். தாம்பூலம் (இசைக்கருவிகள்) வாசிக்கும் போதும், கேளிக்கைகள் மற்றும் விளையாட்டுகளுக்கு நடுவிலும் இபாதத்களை நிகழ்த்துவது அனுமதிக்கப்படாது."
ஹதீஸ் அஷ்-ஷரீஃப்

மீண்டும் அன்று இரவு, ஆயிரம் ஆண்டுகளாக எரிந்து கொண்டிருந்த தீ வழிபாட்டாளர்களின் மிகப்பெரிய தீச் சுடர் திடீரென அணைந்தது. தீ அணைந்து போன திகதியை அவர்கள் பதிவு செய்தனர்; அதே இரவில்தான் ஆட்சியாளரின் அரண்மனையின் கோபுரங்கள் இடிந்து விழுந்தன.

அன்று, புனிதமாக (முகத்தஸ்) கருதப்பட்ட சாவா ஏரியின் நீர் திடீரெனக் குறைந்து, அன்றிரவு ஏரி வறண்டு போனது.

டமஸ்கஸ் அருகே, ஆயிரம் ஆண்டுகளாக தண்ணீர் இல்லாமல் வறண்டு கிடந்த சமவா நதியின் பள்ளத்தாக்கு, அன்றிரவு தண்ணீரால் நிரம்பி ஓடத் தொடங்கியது.

முஹம்மத் அலைஹிஸ்ஸலாம் பிறந்த இரவு முதல், ஷைத்தான்கள் மற்றும் ஜின்களால் குரைஷ் சோதிடர்களுக்கு நிகழ்வுகள் பற்றிய தகவலைக் கொடுக்க முடியாமல் போனது. அதனால் சோதிடம் பார்ப்பது முற்றுப் பெற்றது.

இதுவரை கண்டிராத பல சம்பவங்கள் நமது நாயகம் ஹபீப் அல்-அக்ரம் பிறந்த இரவில் நடந்தன. இவை அனைத்தும் இறுதி நபி முஹம்மத் அலைஹிஸ்ஸலாம் அவர்களின் பிறப்பின் அடையாளங்களாகும்.7

மவ்லித் இரவு

எமது தலைவர் நபிகள் நாயகம் ஸல்லல்லாஹு அலைஹி வஸல்லம் அவர்கள் உலகை கண்ணியப்படுத்திய இரவு மவ்லித் இரவு என்று அழைக்கப்படுகிறது. மவ்லித் என்றால் பிறந்த நேரம் என்று பொருள்.

கத்ர் இரவுக்குப் பிறகு, அதுதான் கண்ணியமான இரவாகும். அந்த இரவில் நமது அன்பார்ந்த நபி பிறந்ததற்காக மகிழ்ந்தவர்கள் மன்னிக்கப்படுவார்கள். அந்த இரவில், ரஸுலுல்லாஹ் பிறந்தபோது கண்ட அதிசயங்கள் மற்றும் அற்புதங்களைப் பற்றிப் படிப்பதும், கேட்பதும், அறிந்து கொள்வதும் நிறைய தவாப்களை (வெகுமதிகளைத்) தருகிறது. எமது அன்பார்ந்த நபியவர்களும் அவற்றைப் பற்றி சொல்லியிருக்கிறார்கள்.

அந்த இரவில், அஸ்ஹாப் அல்-கிராம்கள் ஓரிடத்தில் ஒன்றுகூடி அந்த நாளை நினைவு கூர்ந்து, அதைப் பற்றி வாசிப்பார்கள்; அத்துடன் அதைப் பற்றிக் கதைப்பார்கள்.

ஒவ்வொரு வருடமும், உலகெங்கிலும் உள்ள முஸ்லிம்கள் ரபியுல் அவ்வலின் 12 ஆவது இரவை மவ்லித் கந்தில் (மவ்லித் அந்-நபி) என்று கொண்டாடுகிறார்கள். எல்லா இடங்களிலும், மவ்லித் ஓதுவதன் மூலம் ரஸுலுல்லாஹ் நினைவுகூரப்படுகிறார்.

ஒவ்வொரு நபியின் உம்மத்தும் அவர்களின் நபிமார்களின் பிறந்த நாளை ஒரு பண்டிகையாகக் கொண்டாடினர். இந்த நாள் முஸ்லிம்களின் பண்டிகையாகவும், மகிழ்ச்சியின் நாளாகவும் உள்ளது.

அன்னை ஆமினா அவருடைய தாயார்,
அந்த முத்து அந்த முத்துக் கருவிலிருந்துதான் பிறந்தது.
ரபியுல் அவ்வலில், அந்த மாதத்தில்,
பன்னிரண்டாம் நாள் இரவு, திங்கள் இரவு.
அந்த இரவு, மக்களில் சிறந்தவர் பிறந்தார்,
அவரது தாயார் பல விஷயங்களை பார்த்தார்.
நான் பார்த்தேன் என்று ஹபீபின் தாய் கூறினார்,
இது ஒரு நூர் - ஒளிச் சுடர், அதைச் சுற்றியே சூரியன் சுழன்றது.
திடீரென மின்னல் என் வீட்டிலிருந்து தாக்கியது, 
உலகம் வானம் வரை ஒளிர்ந்தது.
அப்பொழுது வானம் திறந்தது, இருள் மறைந்தது,
நான் மூன்று வானவர்களைக் கண்டேன். அவர்களின் கைகளில் மூன்று விளக்குகள் இருந்தன.
கிழக்கில் ஒன்று, மேற்கில் ஒன்று,
கஃபாவின் கூரையில் ஒன்று.
திடீரென்று, கஃபா பேசியது.
பிரபஞ்சத்தின் சூரியன் இன்றிரவு பிறந்தது என்று கூறியது.
ஓ இலாஹி, முஹம்மதின் பொருட்டு,
பரிந்துரையின் ஆதாரமான அஹ்மதின் பொருட்டு,
அந்தப் பாதுகாவலர் அவருடைய உம்மத்தை அங்கீகரிக்கட்டும்.
ரஹ்மதுல்லாஹி அலைஹிம் அஜ்மஈன்.
அஸ்ஸலாது வஸ்ஸலாமு அலைக்க, யா ரஸுலல்லாஹ்!
அஸ்ஸலாது வஸ்ஸலாமு அலைக்க, யா ஹபீபல்லாஹ்!
அஸ்ஸலாது வஸ்ஸலாமு அலைக்க, யா நூர் அல்-அர்ஷில்லாஹ்!
ஸுலைமான் கலாபி