Севимли Пейгъамберим

КЕДЕР СЕНЕСИ

Эвлят аджысы

Пейгъамбер Эфендимизнинъ (саллаллаху алейхи ве селлем) буюк огълу Къасым он еди айлыкъ экенде вефат эткен эди. Бу аджы вакъиадан йыллар сонъ дигер огълу Абдуллах да вефат этти. Ресулуллах Эфендимиз мубарек козьлеринден яшлар акъкъаны алда дагъгъа айланып: «Эй дагъ! Меним башыма кельген шей сенинъ башынъа кельсе эди, чыдап оламаз, йыкъылыр эдинъ!» буюрды ве кедерини бильдирди. Анамыз Азрети Хатидженинъ: «Я Ресулаллах! Олар шимди къайдалар?» деген суалине исе: «Олар дженнеттелер» буюрды.

Кяинатнынъ Султаны севимли Пейгъамберимизнинъ эки огълунынъ да вефат этмесинен мушриклер пек къувандылар. Эбу Джехиль киби кяфирлер буны фырсат билип: «Артыкъ Муhаммед эбтердир, несли кесильгендир. Неслини девам эттиреджек эркек баласы къалмады. Озю де вефат эткенде, ады-саны унутыладжакъ» деп этрафта шамата къопардылар.

Бунынъ узерине Аллаh Тааля Кевсер суресини эндирип, Ресулыны теселли этти. Меален: «(Хабибим!) Акъикъатен биз санъа Кевсерни бердик (Кевсер хавузыны, пек чокъ хайырны ихсан эттик). О алда Раббинъ ичюн намаз къыл ве къурбан кес… Догърусы, хайырсыз ве несли кесик – санъа (несли кесик деп) тиль узаткъандыр. (Санъа эбтер деген кимсенинъ озю зурриетсиз, шерефсиз ве адсыздыр. Санъа кельгенде, Хабибим, сенинъ пак неслинъ, шанынъ ве шерефинъ къыямет кунюне къадар девам этеджек. Ахиретте де санъа акъылгъа кельмейджек не къадар буюк шерефлер айырылгъандыр.)»1 Бойле буюрылды.

Эбу Талибнинъ вефаты

Ресулуллах (саллаллаху алейхи ве селлем) Эфендимизнинъ огъулларынынъ вефатындан сонъки куньлерде Эбу Талиб хасталанды ве кунь кечкен сайын хасталыгъы агъырлашты. Буны эшиткен къурейшли мушриклер шойле тюшюндилер: «Эбу Талиб сагъ экенде Муhаммедни къорчаламакъ ичюн пек гъайрет эткен эди. Артыкъ кочь вакъты якъынлашты. Сонъки вакътында олса да бир зияретине барайыкъ. Зира Хамза киби тенъи олмагъан бир арап мерти ве эйбети, пеливанлыгъы ве къоркъусызлыгъы кунеш киби мейданда олгъан Умер де мусульман олды. Эр кечкен кунь арап къабилелеринден инсанлар келип, болюк-болюк Онъа табий олалар. Бойлеликнен мусульманлар куньден-куньге чокълаша ве сеслери алемни тута. Бу вазиетке коре, я бизим оларгъа табий олмамыз, я да дженк ве къыталь ичюн азыр олмамыз керек. Эбу Талибке барып вазиетни анълатайыкъ да, арамызны тапсын. Онынъ динине таарруз этмейик, О да бизим динимизге уджюм этмесин.» Бу тюшюндже иле Эбу Талибнинъ янына кельдилер. Укъбе, Шейбе, Эбу Джехиль, Умейе бин Халеф киби танылгъан кимселер Эбу Талибнинъ тёшеги янындаки миндерлерге отурдылар ве дедилер ки: «Сенинъ буюклигинъе инанамыз, усьтюнлигинъни къабул этемиз. Шунынъ ичюн санъа асла къаршы чыкъмадыкъ. Къоркъамыз ки, сен ольгенден сонъ, Муhаммед бизнен огърашыр, душманлыкъ арамызда девам этер. Бизни барыштыр да, бир-биримизнинъ динине таарруз этмейик.»

«Эй дагъ! Меним башыма кельген шей сенинъ башынъа кельсе эди, чыдап оламаз, йыкъылыр эдинъ!» Хадис-и шериф

Анамыз Азрети Хатидженинъ тюрбеси / Дженнету’ль-Муалля

Бир чокъ Ислям буюклерининъ къабирлери киби, севимли Пейгъамберимизнинъ (саллаллаху тааля алейхи ве селлем) ильк зевджеси анамыз Азрети Хатидженинъ (радыяллаху анха) тюрбеси де йыкътырылып, ортадан къалдырылгъандыр.

Эбу Талиб Пейгъамбер Эфендимизни чагъыртып: «Къурейшнинъ бутюн илери кельгенлери сенден оларнынъ динине къарышмамагъынъны риджа этелер. Буны къабул этсенъ, сенинъ эмринъде чалышырлар ве санъа ярдымджы олурлар» деди. Алемлернинъ Эфендиси шойле буюрды: «Эй эмдже! Мен оларны анджакъ бир сёзге давет этмек истейим ки, о сёзнен бутюн араплар оларгъа боюн эгерлер. Арап олмагъанлар да джизье тёлерлер.» Къурейш эшрафына да: «Эбет! Сиз манъа бир сёз айтсанъыз, онынънен бутюн арапларгъа укюм этерсинъиз, арап олмагъанлар да сизге боюн эгерлер» буюрды. Эбу Джехиль: «Олур. Оны он кере айтырмыз. Не экен о сёз?» деди. Ресулуллах Эфендимиз: «„Ля иляхе иллаллах“ десенъиз ве Аллаh Таалядан башкъа табынгъан путларынъызны да къалдырып атсанъыз» буюргъанда, мушриклер аман: «Сен бизден мындан башкъа бир шей исте!…» дедилер. Пейгъамбер Эфендимиз: «Сиз кунешни кетирип эллериме къояджакъ олсанъыз биле, мен сизден мындан башкъасыны истемем» буюрды.

Мушриклер: «Я Эба’ль-Къасым! Пек аджайип бир теклиф этесинъ. Биз сенинъ хатырынъа риает этмек истеймиз; сен исе бизим хатырымызны хош этмейсинъ!» дедилер ве турып кеттилер. Олар кеткенде, Эбу Талиб Пейгъамбер Эфендимизге: «Сенинъ Къурейштен истеген шейинъ пек еринде эди. Догъру айттынъ» деди. Эмджесининъ бу сёзю Ресулуллах Эфендимизге умют берди ве Эбу Талибнинъ иман кетиреджегини анълап: «Эй эмдже! Бир кере „Ля иляхе иллаллах“ де!… Та ки, къыямет куню санъа шефаат этейим» буюрды. Эбу Талиб: «Халкъ „олюмден къоркъты да, шунынъ ичюн мусульман олды“ деп айыпламаларындан къоркъам. Ёкъса, сенинъ хатырынъны хош этер эдим» деп, нефсине агъыр кельгенини айтты ве хасталыгъы кет-кете агъырлашкъанынен вефат этти.2

Анамыз Азрети Хатидженинъ вефаты

Бисетнинъ онунджы сенесинде, Эбу Талибнинъ вефатындан учь кунь сонъ, Ресулуллах Эфендимизнинъ дерт ортагъы, йигирми беш сенелик аят аркъадашы олгъан мубарек анамыз Азрети Хатидже де дерт ве кедерлер иле кечкен учь сенелик мухасарадан сонъ, иджреттен учь сене эвель, Рамазан айынынъ башында, 65 яшында вефат этти.3 Фахр-и кяинат (саллаллаху алейхи ве селлем) Эфендимиз анамыз Азрети Хатиджени озь мубарек эллеринен дефн этти. Онынъ айрылыгъындан пек кедерленди.

Айны сене ичинде анамыз Азрети Хатидженинъ ве эмджеси Эбу Талибнинъ бир-бири артындан вефаты Пейгъамбер Эфендимизни кедерге богъгъан эди. Бундан толайы бу сенеге «Сенету’ль-хузн», яни кедер сенеси денильди.

Анамыз Азрети Хатидженинъ вефаты севимли Пейгъамберимизни сарсып, аддинден зияде кедерлендирген эди. Чюнки энъ эвель имангъа кельген ве Ресулуллах Эфендимизни тасдикъ эткен о эди. Бундан гъайры, Онынъ энъ буюк таянчы ве теселли бериджиси эди. Эр кес душман экенде, о бутюн юрегини ачкъан ве Пейгъамберимизнинъ севгисинен толгъан эди. Бутюн малыны, серветини, неси бар олса, Ислямиет огърунда сарф эткен, севимли Пейгъамберимизнинъ хызметини корьмек ичюн геджесини куньдюзюне къаткъан эди. Ресулуллахны ич бир вакъыт кедерлендирмеген, асла гонълюни къырмагъан эди. Пейгъамбер Эфендимиз буны вакъыт-вакъыт анълатыр, бойлеликнен мубарек зевджесининъ фазилетлерини анъар эди.

«Эй эмдже! Бир кере „Ля иляхе иллаллах“ де!… Та ки, къыямет куню санъа шефаат этейим» Хадис-и шериф

Бир кунь Пейгъамберимиз тышарыда экенде, Азрети Хатидже Оны къыдырмакъ ичюн чыкъкъан эди. Джебраил алейхисселям инсан къыяфетинде Азрети Хатиджеге корюнди. Анамыз Азрети Хатидже ондан Пейгъамбер Эфендимизни сорамакъ истесе де, душманлардан олмасы ихтималыны тюшюнип кери къайтты. Севимли Пейгъамберимизни эвде корьгенде, вакъианы анълатты. Фахр-и кяинат Эфендимиз шойле буюрды: «Сен корьген ве мени сорамакъ истегенинъ о затнынъ ким олгъаныны билесинъми? О Джебраил (алейхисселям) эди. Селямыны санъа бильдирмемни айтты. Шуны да санъа бильдирмемни айтты ки, дженнетте сен ичюн инджилерден япылгъан бир бина азырлангъандыр. Эльбетте анда бойле кедерли, сыкъынтылы, захметли ве агъыр шейлер олмайджакъ.»

Бирининъ эли авада къалды, бири сокъур олды

Севимли Пейгъамберимиз (саллаллаху алейхи ве селлем) инсанларнынъ энъ бахтлыларындан олгъан асхабынен бенъзери олмагъан субетлер этип, оларнынъ юреклерини нурландыра эди. Кельген ает-и керимелерни изах этер, анълатылмагъан, анъланылмагъан ич бир шей къалдырмаз эди. Бу арада мушриклер де имангъа кельсин деп, олар топлангъан ерлерге барыр, усанмадан ве ёрулмадан оларны имангъа давет этер эди. Бу вазиетке Эбу Джехиль иле Велид бин Мугъире пек ачувлана: «Бу кетишнен Муhаммед эр кесни озь динине чевиреджек, путларымызгъа табынгъан кимсе къалдырмайджакъ» дей эдилер. Бир кунь бу ишни битирмекнинъ бирден-бир чареси алемлернинъ Эфендиси олгъан севимли Пейгъамберимизни ольдюрмек олгъанына къарар бердилер. Эбу Джехиль Велид бин Мугъирени ве Махзум огъулларындан бир къач йигитни янына алып, Бейтуллахкъа кельди. Шу вакъыт севимли Пейгъамберимиз намаз къыла эди. Эбу Джехиль элине алгъан бир ташнен аман илери атылды. Хабиб-и Экрем ве Небий-и мухтерем Эфендимизге ташны урмакъ ичюн элини котерген анда, эллери авада къыбырдамай къалды. Ич бир шей япалмады ве шашып къалды. Шу алда кельген ерине кетти. Мушриклернинъ янына баргъанда, эли эски алына къайтты ве таш ерге тюшти. Айны ташны Махзум огъулларындан бири къапып: «Корерсинъиз! Оны мен ольдюреджегим!…» деп, Пейгъамбер Эфендимизге догъру юрди. Якъынлашкъанда, бир ань ичинде козю сокъур олып, этрафыны коралмаз олды. Бунынъ узерине Махзум огъуллары эписи берабер севимли Пейгъамберимизге догъру илерледилер. Пейгъамбер Эфендимизге пек якъынлашкъан анда, Оны коралмаз олдылар. Амма мубарек сесини эшите эдилер. Сес кельген ерге юргенлеринде, сес артларындан, артларына айлангъанларында исе эвельки ерден кельмеге башлады. Айны алгъа бир къач кере шаат олдылар. Сонъунда шашып къалып, Ресулуллах Эфендимизге ич бир шей япалмадан о ерни ташладылар.

Азрети Айше ве Азрети Севденинъ нишаны

Азрети Хатидже (радыяллаху анха) вефат эткенде, Ресулуллахнынъ эвине бакъаджакъ кимсе къалмады. Хавле бинт Хаким Хатун бу алны корип, Сервер-и алемнинъ узурына барды ве: «Я Ресулаллах (саллаллаху алейхи ве селлем)! Санъа мувафыкъ бир ёлдаш ве хызметинъе ляйыкъ бир зевдже керек. Эгер арзу этсенъиз, сизге бир дост истейим» деди. Ресулуллах: «Эй Хавле, бу хызметке ляйыкъ къадын къайда бар?» буюрды. Хавле: «Къыз истесенъ, достунъ Эбу Бекирнинъ къызы Айшедир. Тул истесенъ, Севде бинт Зем’а мунасип олур» деди. Ресул алейхисселям: «Экисини де манъа исте» буюрды. Ресулуллах эвеля Азрети Айшенен, сонъра Севденен нишанланды. Азрети Севдени Меккеде эвине алды. Азрети Айшенен тою иджретнинъ экинджи сенеси Шевваль айында Мединеде олды.

Акъабе корюшюви

Севимли Пейгъамберимиз эр сене Кябени зиярет этмеге кельген къабилелерни динге давет эте, оларнынъ джеэннем атешинден къуртулып, эбедий сеадетке къавушмалары ичюн чалыша ве эр тюрлю акъаретке бакъмадан пейгъамберлик вазифесини ерине кетирмеге девам эте эди. Къабилелернинъ тюшкен ерлеринде тура, кельгенлерге: «Аллаh Таалянынъ пейгъамберлик вазифесини ерине кетиргендже мени барындыраджакъ ве манъа ярдым этеджек ким бар? (Бойлеликнен) онъа дженнет берильсин» буюра эди, амма не барындыраджакъ, не де ярдым этеджек бир кимсе тапылмай эди.

Бисетнинъ онунджы сенеси, Зильхидже айы эди. Пейгъамбер Эфендимиз панаирде Кябени зиярет ичюн кельген Медине халкъындан бир джемаатнен къаршылашты. Оларгъа: «Сиз кимлерсинъиз?» деп сорагъанда, мединели ве Хазредж къабилесинден олгъанларыны айттылар. Пейгъамберимизнинъ къартбабасы Абдулмутталибнинъ анасы Сельма Хатун да Хазредж къабилесининъ Неджран огъуллары къолуна менсюп эди. Пейгъамберимиз хазреджли бу алты кишинен Акъабеде бир муддет отурып, оларгъа Ибрахим суресининъ 35–52-нджи ает-и керимелерини окъуды ве Ислямиетни анълатты. Бу динге кирмелери ичюн давет этти.

Мединеде эскиден берли Эвс ве Хазредж къабилелери еудийлерге душман эдилер, фырсат тапкъанда бир-бирлерине уджюм эте эдилер. Араларында эр сефер бир къавга олгъанда, еудийлер: «Якъында бир Пейгъамбер келеджек. Чокъ къалмады, бугунь-ярын зухур этер. Биз Онъа табий олып къуветленирмиз. Сизинъ де акъкъынъыздан келирмиз» дей эдилер. Эвс ве Хазреджлилер де еудийлерден эвель мусульман олып, Ислямиетнен шереф тапсалар, оларгъа гъалип келеджеклерине ве оларны Мединеден чыкъараджакъларына инана эдилер.

Къабилесининъ буюклеринден ве Мединеде яшагъан еудийлерден якъында бир пейгъамбер келеджегини эшиткен бу насипли инсанлар Ресул-ы Экрем (саллаллаху алейхи ве селлем) Эфендимиздеки нубувват ишаретлерини корьдилер ве Эфендимиз оларны динге чагъыргъанда, бир-бирлерине бакъыштылар. Сонъ: «Еудийлернинъ хабер бергени – иште бу пейгъамбердир!» деп араларында лаф эттилер.

Шунынъ ичюн аман Ресулуллахнынъ узурында Келиме-и шеадет кетирип мусульман олдылар. Пейгъамбер Эфендимизге де: «Я Ресулаллах! Биз къавмымызны еудийлерге къаршы дженклешкен алда быракъкъан эдик. Умют этемиз ки, Аллаh Тааля оларны да зат-ы алинъиз себебинден иман этмекнен шерефлендирир. Биз къайткъанымызнен оларны ве къавмымызны сенинъ пейгъамберлигинъни къабул этмеге давет этеджекмиз. Бу динден къабул эткен шейлеримизни оларгъа да анълатаджакъмыз. Эгер Аллаh Тааля оларны бу дин узеринде топлап бирлештирсе, сенден даа азиз ве шерефли кимсе олмаз» дедилер.

Бу алты киши акъикъатен инангъан, Аллаh Таалянынъ Пейгъамберимизге теблигъ эткенлерини къабул ве тасдикъ эткен эдилер.

«Аллаh Таалянынъ пейгъамберлик вазифесини ерине кетиргендже мени барындыраджакъ ве манъа ярдым этеджек ким бар? (Бойлеликнен) онъа дженнет берильсин» Хадис-и шериф