Севимли Пейгъамберим

Лейле-и Та’рис къыссасы

Хайбер гъазвасындан къайткъанда, Та’рис деген ерде токътап раатландылар. О гедже Ресулуллах Азрети Билялни чагъырды ве: «Я Билял! Бу гедже юкълама! Сабаны бекле де, бизни намазгъа уяндыр» буюрды. Сонъра Ресулуллах асхабнен берабер юкъугъа ятты. Азрети Билял бир мыкъдар намаз къылды. Юзюни шаркъкъа къаршы тутып, аркъасыны юкюне таяды. Намаз вакътыны беклегенде, юкълап къалды. Ойле ёргъун эдилер ки, кунешнинъ нурлары ер юзюни ысытып, юзьлерине тийгендже, ич кимсе козюни ачалмады. Эписинден эвель Ресулуллах уянды. Велхасыл турып, абдест алдылар. Азрети Билял икъамет кетирди. Саба намазыны джемаатнен къаза эттилер. Намаз биткенден сонъ Ресулуллах саллаллаху алейхи ве селлем: «Бир кимсе намазыны унутса, хатырлагъан анда тез эда этсин. Зира Хакъ Тааля: „Экъими’с-салята ли зикри (намазны мени анъмакъ, буюклигимни хатырламакъ ичюн къыл)“ деп буюргъандыр» буюрды.

Кунешнинъ Азрети Али ичюн кери къайтмасы

Хайбер гъазвасындан къайткъанда Ресулуллах саллаллаху алейхи ве селлем Сахбада раатлана эди. Мубарек башыны Азрети Алининъ (радыяллаху анху) тизине къойгъан эди. О вакъыт вахий кельмеге башлады. Кунеш де уфукъта эди. Азрети Али радыяллаху анху экинди намазыны къылмагъан эди. Вахий тамам олгъанда, кунеш батты. Ресулуллах саллаллаху алейхи ве селлем: «Я Рабби! Эгер Али радыяллаху анху Сенинъ ве Ресулынънынъ тарафында исе, кунешни кери къайтар» деп дуа этти. Азрети Али намазны къылгъандан сонъ, кунеш кене батты. Эсма бинт Умейс айта ки: «Кунешнинъ батып тургъаны алда кене чыкъкъаныны ве ер юзюни айдынлаткъаныны корьдим.»

Вади’ль-Къура гъазвасы

Бу гъазва Джемазиель-ахыр айында Вади’ль-Къурада олды. Ресулуллахнынъ Ислям аскеринен Вади’ль-Къурагъа кельгенини хабер алгъан шу тарафтаки еудийлер арап мушриклерининъ бир болюгининъ ярдымынен дженкке азырландылар. Ерлеринден чыкъып, дженк сырасына тиздилер. Пейгъамбер алейхисселям да дженк низамы алдырды ве байракъны асхабдан бирине берди. Кяфирлерни Ислямгъа давет этти: «Эгер имангъа кельсенъиз, джанларынъызны ве малларынъызны къуртарырсынъыз» буюрды. Насиатны къабул этмедилер. Мушриклерден бири мейдангъа чыкъып, урушмакъ истеди. Зубейр бин Аввам радыяллаху анху оны ольдюрди. Даа бириси Азрети Алининъ къаршысына чыкъты. Азрети Имам о кяфирни шу ань джеэннем атешине ёллады. Даа бириси кельди. Оны да ольдюрди. Эки еудийни де Эбу Дуджане радыяллаху анху ольдюрди. О кунь он беш кяфир ольдюрильди. Акъшам олып, эр кес озь къонагъына кетти. Саба кене эки тараф къылычларыны сыйырып, дженкке азыр олды. Кунеш бир мызракъ бою котерильгенде, кяфирлерге къоркъу тюшти ве къачтылар. Муджахидлер чокъ нимет ве гъанимет алдылар. Тейма еудийлери де Вади’ль-Къура еудийлерининъ бу акъибетинден къоркъугъа къапылдылар. Мульклерини сакъламакъ ичюн джизье бермеге разы олдылар ве сульх япылды.

«Хайбер къалесининъ къапысыны беден кучюнен дегиль, рухий бир кучьнен котердим» Азрети Али (радыяллаху анху)

Вади’ль-Къура гъазвасы