Севимли Пейгъамберим

ПЕЙГЪАМБЕР ЭФЕНДИМИЗНИНЪ МУБАРЕК АДЛАРЫ

Севимли Пейгъамберимизнинъ (саллаллаху алейхи ве селлем) энъ чокъ айтылгъан ады «Муhаммед»дир. О, «пек чокъ макъталгъан, зияде бегенильген» манасына келе. Бу ад Къур’ан-ы Керимде Ал-и Имран суресининъ 144-нджи, Аhзаб суресининъ 40-нджы, Фетиh суресининъ 29-нджы ве Муhаммед суресининъ 2-нджи ает-и керимелеринде дёрт кере кече. Иса алейхисселям да, Сафф суресининъ 6-нджы ает-и керимесинде буюрылгъаны киби, умметине меален: «Эй Исраил огъуллары! Мен сизге Аллаhнынъ пейгъамберим. Тевратны тасдикъ этиджи ве менден сонъ келеджек бир пейгъамбернинъ муждеджиси оларакъ кельдим ки, о пейгъамбернинъ ады Аhмеддир» деп хабер берген. Аhмед – энъ чокъ макъталгъан, севильген демектир.

Къур’ан-ы Керимде «Муhаммед» ве «Аhмед» адларындан гъайры: Маhмуд, Ресул, Небий, Шахид, Бешир, Незир, Мубешшир, Мунзир, Даи-и иляллах, Сирадж-ы мунир, Рауф, Рахим, Мусаддыкъ, Музеккир, Муддессир, Абдуллах, Керим, Хакъ, Мунир, Нур, Хатему’н-небийин, Рахмет, Нимет, Хади, Таhа, Ясин… деп анъылгъан. Бундан гъайры мубарек адларынынъ бир къысмы Къур’ан-ы Керимде, бир къысмы хадис-и шерифлерде, бир къысмы да эвельки пейгъамберлерге ёллангъан мукъаддес китапларда анъылгъан. Базы хадис-и шерифлеринде Пейгъамберимизнинъ: Махи, Акъиб, Мукъаффи, Небийю’р-рахме, Небийю’т-тевбе, Небийю’ль-мелахим, Къаттал, Мутеваккиль, Фатих, Хатем, Мустафа, Уммий, Къусем (эр хайырны озюнде топлагъан) адлары кече. Бир хадис-и шерифте Пейгъамберимиз: «Манъа махсус беш ад бар: Мен Муhаммедим, мен Аhмедим, мен Махийим ки, Аллаh Тааля меним вастамнен куфюрни ёкъ этер. Мен Хаширим ки, халкъ къыямет куню меним изимден хашр олунаджакъ. Мен Акъибим ки, менден сонъ пейгъамбер ёкътыр» буюрды.1

Севимли Пейгъамберимизге Азрети Хатиджеден догъгъан ве кичкене яшында вефат эткен огълу Къасым себебинден «Эбу’ль-Къасым» куньеси берильген. Кене пейгъамберлигинден эвель ондаки догърулыкъ, ишанч, эмин ве ишанчлы олмасы киби сайып битирильмейджек къадар усьтюн мезиетлери себебинден Къурейш къабилеси арасында «Эль-Эмин» адынен чагъырылгъан. Ресулуллах саллаллаху алейхи ве селлем Эфендимизнинъ Къур’ан-ы Керимде кечкен адларындан бири де Къур’ан-ы Керимнинъ юреги олгъан Ясин суресиндеки «Ясин» сёзюдир. Улема-и расихиннинъ буюклеринден олгъан Азрети Сейид Абдулхаким-и Арваси: «Ясин – „эй меним бахр-и якъинимнинъ себбахы олгъан Хабибим“, яни „эй меним мухаббет дерьямнынъ далгъычы олгъан Хабибим“ демектир» буюргъан. Бу дерьянынъ адыны эшиткенлер, узакътан корьгенлер, якъынына кельгенлер, ичине кирип насиби къадар терен тюшкенлернинъ эписи омюрлерининъ эр девринде Ресулуллахнынъ ашкъынен янып тутушкъанлар; яныкъ фигъанлар, ичтен акъкъан козь яшлары ве якъыджы мысралар иле бу ашкъларыны тильге кетиргенлер. Буларнынъ ичинде энъ буюк ве мешурларындан бири ве бу мухаббет дерьясындан буюк пай алгъан Азрети Мевляна Халид-и Багъдадийдир. О, Ресулуллах Эфендимизге олгъан мухаббетини ве ашкъыны тильге кетирген къасиделеринден биринде шуларны яза:

«Эй Исраил огъуллары! Мен сизге Аллаhнынъ пейгъамберим. Тевратны тасдикъ этиджи ве менден сонъ келеджек бир пейгъамбернинъ муждеджиси оларакъ кельдим ки, о пейгъамбернинъ ады „Аhмед“дир» Сафф: 6

Эй Сервер-и алем, санъа ашыкъ олып янарым!
Къайда олсам да, о гузель джемалинъни арарым.
Къабе къавсейн тахтынынъ султаны сенсинъ, мен исе ич бир шей дегилим,
«Мусафиринъим» демекни эдепсизлик санарым.
Дюньядаки эр шей сенинъ шерефинъе яратылды,
Рахметинъ манъа да ягъса, о ань меним баарым.
Эр кес Кябени таваф этмек ичюн Хиджазгъа келе,
Санъа къавушмакъ асретинен мен дагъларны ашарым.
Тюшюмде башыма сеадет таджы кийдирильди,
Аягъынънынъ топрагъы юзюме сепильди, санарым.
Достуны макътагъан ашыкъларнынъ бюльбюли, эй Джамий!
Диванынъдаки шу сатырлар меним терджиманым:
«Тили саркъкъан, сувсыз къалгъан, къотюр бир копек киби,
Сенинъ ихсан денъизинъден бир тамчы арзу этерим.»

Пейгъамбер Эфендимизни макътагъан парча-парча язылгъан шиирлер ве медхиелер бир тарафта турсын, Онынъ ичюн пек чокъ эсерлер язылгъан. Буларны язгъанлар ичинде шуретлери ве санатлары бутюн дюньяны ве асырларны къаплагъанлар биле Ресулуллахны макътамакътан аджиз олгъанларыны бильдиргенлер. Оны корип гузеллигине ашыкъ олгъанлар тиллери айлангъаны къадар анълатмагъа чалышкъанлар, о гузелликни бильдирмеге инсан кучю етмез дегенлер.

Ислям алимлерининъ китапларында о ашыкъларнынъ хабер бергенлеринден юзлердже язылгъан. Окъугъанлар Аллаh Тааля севимли Пейгъамберини тюшюнильмейджек бир тертипте ве бакъып тоюлмайджакъ бир гузелликте яраткъаныны тез анъларлар. Корьмеден Онъа гонъюль берелер. Хабибуллахкъа ашыкъ олгъанлар эр нефесте джигерлерине кирген аванынъ серинлигинде Онынъ севгисининъ тадыны дуялар. Айгъа эр бакъкъанда, Онынъ мубарек козьлеринден кельген нурларнынъ аксини къыдырмакънен зевкъленелер. Онынъ гузеллик дерьясындан бир тамчыгъа къавушкъанларнынъ эр зерреси шойле дей:

Гузель янагъынъны бильген гульге ич бакъмаз,
Сенинъ севгинъде эриген дерман арамаз!

Энес бин Маликтен ривает олунгъан бир хадис-и шерифте шойле буюрылды: «Мен онъа эвлядындан да, бабасындан да ве бутюн халкътан даа севимли олмагъандже, сизден ич бири иман эткен олмаз.»2 Бир кунь Азрети Умер Пейгъамбер Эфендимизге: «Я Ресулаллах! Аллаh Таалягъа ант этем ки, джанымдан гъайры, манъа эр шейден севимлисинъ» деди. Ресулуллах Эфендимиз исе: «Мен онъа джанындан даа севимли олмагъандже, сизден ич бири асла иман эткен олмаз» буюрды. Бунынъ узерине Азрети Умер: «Я Ресулаллах! Санъа Къур’ан-ы Керимни эндирген Аллаh Таалягъа ант этем ки, сен манъа джанымдан даа севимлисинъ» дегенде: «Эй Умер, шимди (тамам) олды» буюрды.

Феза деври, компьютер,
Нидже янъы васталар –
Менбасы эп Къур’анда бар,
Рахметсинъ, я Ресулаллах.
Эмиет бердинъ теджрибеге,
Ильмни, фенни огренмеге,
Ёл косьтердинъ илериге,
Ышыкъсынъ, я Ресулаллах.
Сени севген бизге ярдыр,
Сенсиз бизге дюнья тардыр,
Эр шей сенинъ ичюн бардыр,
Ниметсинъ, я Ресулаллах.
Сенден алды фикирлерни,
Ильмни, фенни ве санатны,
Файдаланды Шаркъ ве Гъарп,
Ёлбашчысынъ, я Ресулаллах.
Догъру чыкъты не деген олсанъ,
Он беш асыр эвелинден,
Муhаммедуль-Эминсинъ сен,
Адильсинъ, я Ресулаллах.
Яхшылыкъта, адалетте,
Джумертликте, асалетте,
Мерхаметте, фазилетте,
Нумюнесинъ, я Ресулаллах.

«Мен онъа джанындан даа севимли олмагъандже, сизден ич бири асла иман эткен олмаз» Хадис-и шериф

Пейгъамбер Эфендимизнинъ (саллаллаху алейхи ве селлем) месджид-и шерифиндеки «Къуббе-и хадра / Ешиль къуббе»нинъ тыштан корюниши