СОЛШУМОР

Ёддошт: (б) солҳои баъсат, (м) солҳои милодӣ ва (ҳ) солҳои ҳиҷриро нишон медиҳад.

м. 570 Издивоҷи ҳазрати Абдуллоҳ ва ҳазрати Омина. Ба модараш гузаштани нури мубораки Паёмбари маҳбуби мо (ҷумодиулаввал / июл). Соли фаровонӣ. Вафоти ҳазрати Абдуллоҳ, падари Расулуллоҳ (раҷаб / сентябр).

571 Воқеаи Фил (муҳаррам / феврал). Валодати Султони коинот Муҳаммад алайҳиссалом (12 рабеъулаввал, душанбе / 20 апрел; 53 (ба ҳисоби шамсӣ 51) сол пеш аз ҳиҷрат, 55 рӯз пас аз воқеаи Фил). Ба модари ширии худ Ҳалима супурда шудани Ӯ (рабеъуссонӣ).

573 Таваллуди ҳазрати Абӯбакр разияллоҳу анҳ.

576 Аз ҷониби модари ширӣ ба Макка оварда шуда, ба модараш Омина супурда шудани Ӯ.

577 Вафоти Омина, модари Паёмбари маҳбуби мо, дар Абво. Дар Макка аз ҷониби Умму Айман ба бобояш Абдулмутталиб супурда шудани Расулуллоҳ. Таваллуди ҳазрати Усмон разияллоҳу анҳ.

579 Вафоти бобояш Абдулмутталиб ва ба амакаш Абӯтолиб амонат супурда шудани Ӯ.

583 Бо амакаш Абӯтолиб ҳамроҳи корвони тиҷоратии Шом ба роҳ баромадан ва аз Бусро баргаштани Ӯ. Таваллуди ҳазрати Умар разияллоҳу анҳ.

588 Бо амакаш Зубайр ба Яман рафтани Ӯ.

591 Бо ҳазрати Абӯбакр ба Шом рафтани онҳо. Ба паймони Ҳилфулфузул ҳамроҳ шудани Расулуллоҳ.

595 Бо корвони тиҷоратии ҳазрати Хадича ба шаҳри Бусро рафтани Ӯ.

596 Издивоҷи Ӯ бо ҳазрати Хадича.

599 Таваллуди ҳазрати Алӣ разияллоҳу анҳ.

600 Хитобаи Қус ибни Соида дар бозори Укоз, ки дар он ба паёмбарии Расулуллоҳ мужда дод.

605 Ҳангоми таъмири Каъба барои ба ҷояш гузоштани Ҳаҷаруласвад ҳакам шудани Ӯ.

б. 1/610 Баъсат: дар 40-солагӣ эълон шудани паёмбарии Ӯ (17 рамазон, душанбе). Нахустин ваҳй дар ғори кӯҳи Ҳиро (Ҷабалуннур) (нозил шудани панҷ ояти аввали сураи Алақ) (рамазон / август).

2/611 Пас аз муддате қатъ шудани ваҳй, бо орзуи дидани Ҷабраил алайҳиссалом пай дар пай ба ғори кӯҳи Ҳиро рафтани Сарвари мо, Паёмбар. Омадани Исрофил алайҳиссалом ва баъзе чизҳоро ба Ӯ омӯзонданаш.

3/612 Нахустин мусалмонон: ҳазрати Хадича, Абӯбакри Сиддиқ, Алӣ ибни Абӯтолиб, Зайд ибни Ҳориса (ва ҳамсараш Умму Айман), Усмон ибни Аффон, Талҳа ибни Убайдуллоҳ, Зубайр ибни Аввом, Абдурраҳмон ибни Авф, Саъд ибни Абӯваққос.

4/613 Аз хешовандони наздикаш оғоз карда, инсониятро ба ислом даъват кардани Расулуллоҳ. Аз ҷониби мушрикон оғоз ёфтани озору шиканҷаи мусалмонон. Нахустин шаҳидон: ҳазрати Ёсир, писараш ҳазрати Абдуллоҳ ва ҳамсараш ҳазрати Сумайя. Таваллуди ҳазрати Оиша разияллоҳу анҳо.

5/614 Нахустин ҳиҷрат ба Ҳабашистон (раҷаб / май). Аз Ҳабашистон ба Макка баргаштани муҳоҷирон (шаввол / июл).

6/615 Мусалмон шудани ҳазрати Ҳамза. Мусалмон шудани ҳазрати Умар. Ҳиҷрати дуюм ба Ҳабашистон. Аз Дорул-Арқам баромадани Расулуллоҳ ва мусалмонон.

7/616 Оғози муҳосира (муҳаррам).

8/617 Аз Ҳабашистон баргаштани ҳазрати Усмон ва ҳамсараш ҳазрати Руқайя.

9/618 Мӯъҷизаи Шаққулқамар: бо ишораи Расулуллоҳ ду пора шудани моҳ.

10/619 Бардошта шудани муҳосира.

10/620 Вафоти Абӯтолиб (7 рамазон / апрел). Вафоти модари мо ҳазрати Хадича (10 рамазон / апрел). Издивоҷи Расулуллоҳ бо ҳазрати Савда бинти Замъа (рамазон / май). Бо Зайд ибни Ҳориса ба Тоиф рафтани Расулуллоҳ (шаввол / май). Исломро қабул кардани ҷинҳои Насибин. Аз Тоиф ба Макка баргаштани Расулуллоҳ (23 зулқаъда). Мулоқоти Ақаба (10 зулҳиҷҷа / 17 июл).

11/621 Мӯъҷизаи Меъроҷ ва фарз шудани намозҳои панҷгона (27 раҷаб). Дар назди дари Каъбаи шариф ду рӯз ба Расулуллоҳ имомат кардани Ҷабраил алайҳиссалом. [Дар бораи таърихи Меъроҷ ривоятҳои дигар низ ҳаст. Меъроҷ борҳо рух додааст. Яке аз онҳо дар бедорӣ ва бо ҷасади шарифу мубораки Ӯ буд. Дигарҳо танҳо бо рӯҳи мубораки Ӯ буданд.]

Баста шудани ақди никоҳи Расулуллоҳ бо ҳазрати Оиша (шаввол). Байъати якуми Ақаба (10 зулҳиҷҷа / 6 июл, душанбе). Барои омӯзонидани ислом ба Мадина фиристодани Мусъаб ибни Умайр аз ҷониби Расулуллоҳ.

12/622 Санатус-сурур (Соли шодӣ): исломро қабул кардани бештари мардуми Мадина. Байъати дуюми Ақаба (12 зулҳиҷҷа / 28 июн, душанбе).

13/1/622 Соли 13-уми баъсат, соли 1-уми ҳиҷрат ва соли 622-юми милодӣ. Соли ҳиҷрӣ: оғози соли ҳиҷрии қамарии мусалмонон (1 муҳаррам / 16 июл). Санатул-изн: иҷозат ёфтани мусалмонон барои аз Макка ба Мадина ҳиҷрат кардан. Дар Дорун-надва ҷамъ омадани мушрикон ва барои куштани Расулуллоҳ қарор қабул карданашон (25 сафар / 8 сентябр). Ҳиҷрат: бо ҳазрати Абӯбакр ба сӯи ғори Савр ҳаракат кардани Расулуллоҳ (26 сафар, панҷшанбе / 9 сентябр). Аз ғори кӯҳи Савр ба сӯи Мадина ба роҳ баромадани онҳо (1 рабеъулаввал, душанбе / 13 сентябр). Ба деҳаи Қубо расидани онҳо (8 рабеъулаввал, душанбе / 20 сентябр). Бинои Масҷиди Қубо (8–11 рабеъулаввал / 20–23 сентябр). Дар намозгоҳи водии Ронуно, миёни Қубо ва Мадина, нахустин намози ҷумъаро ба имомат хондани Расулуллоҳ (12 рабеъулаввал, ҷумъа / 24 сентябр). Ба Мадина расидан (12 рабеъулаввал, ҷумъа / 24 сентябр). Дар хонаи Абӯайюби Ансорӣ меҳмон шудани онҳо. Оғози бинои Масҷиди Набавӣ (рабеъулаввал / сентябр). Ба Мадина омадани аъзои хонавода. Дар як рӯз панҷ вақт гуфта шудани азони Муҳаммадӣ. Мусалмон шудани Салмони Форсӣ.

ҳ. 1/623 Барқарор шудани бародарӣ миёни муҳоҷирон ва Ансор. Нахустин аҳдномаи хаттӣ: Санади Мадина ва ҳарам муайян шудани водии Мадина (рамазон / март). Иҷозат ёфтани ҷанг. Нахустин сария: сарияи ҳазрати Ҳамза ба Ийс / Сифулбаҳр (рамазон / март). Анҷом ёфтани бинои Масҷиди Набавӣ (шаввол / апрел). Барпо шудани Суффа дар Масҷиди Набавӣ. Барпо шудани бозор ва ҷои хариду фурӯш дар Мадина. Нахустин барӯйхатгирии мусалмонон. Сафари Убайда ибни Ҳорис ба Робиғ (шаввол / апрел).

Сарияи Саъд ибни Абӯваққос ба Харрор (зулқаъда / май). Вафоти Асъад ибни Зурора, Баро ибни Маърур ва Кулсум ибни Ҳидм. Вафоти Усмон ибни Мазъун ва барои қабристон ҷудо карда шудани Ҷаннатулбақеъ (зулҳиҷҷа / июн).

2/623 Бори аввал дар рӯзи Ошуро рӯза гирифтани Расулуллоҳ (10 муҳаррам / 14 июл). Нахустин ғазва: ғазваи Абво (Ваддон) (12 сафар / 15 август). Ғазваи Бувот (1 рабеъулаввал / 2 сентябр). Ғазваи Бадри аввал / Сафвон (рабеъулаввал / сентябр). Ғазваи Зулушайра (1 ҷумодиулаввал / 31 октябр).

2/624 Сарияи Абдуллоҳ ибни Ҷаҳш ба Батни Нахла (20 раҷаб / 17 январ). Баста шудани ақди никоҳи ҳазрати Алӣ ва ҳазрати Фотима (раҷаб / январ). Аз Масҷидулақсо ба Масҷидулҳаром / Каъба гардонида шудани қибла (11 шаъбон, сешанбе / 7 феврал). Фарз шудани рӯза (шаъбон / феврал). Оғози хондани намози таровеҳ (1 рамазон / 26 феврал). Пеш аз Бадр ба Макка баргаштани боз 33 нафар аз асҳобе, ки дар Ҳабашистон буданд; аз онҳо 2 нафар дар Маккаи мукаррама вафот карданд, 7 нафар аз ҷониби мушрикон зиндонӣ шуданд ва 24 нафар ба Мадинаи мунаввара расида, дар ғазваи Бадр ширкат карданд. Ғазваи Бадр (12 рамазон / 13 март). Кушта шудани Абӯҷаҳл. Вафоти ҳазрати Руқайя, духтари Расулуллоҳ (рамазон / март). Фарз шудани закот (рамазон / март). Амр шудани садақаи фитр (фитра) (рамазон / март). Нахустин Иди рамазон ва хонда шудани намози ид (1 шаввол / 27 март). Издивоҷи Расулуллоҳ бо ҳазрати Оиша (шаввол / апрел). Ҳангоми аз Макка ба Мадина омадан мавриди ҳамла қарор гирифтани ҳазрати Зайнаб (аввали шаввол / март). Ғазваи Қарқаратулкудр (5 шаввол / 31 март). Ғазваи Бани Қайнуқоъ (15 шаввол / 10 апрел). Ғазваи Савиқ (5 зулҳиҷҷа / 29 май). Издивоҷи ҳазрати Алӣ ва ҳазрати Фотима (зулҳиҷҷа / май). Нахустин Иди қурбонро дарёфтан (10 зулҳиҷҷа / 3 июн).

3/624 Кушта шудани Каъб ибни Ашраф (4 рабеъулаввал / 25 август). Ғазваи Анмор (Ғатафон, Зиамр) (12 рабеъулаввал / 2 сентябр). Ғазваи Баҳрон (Наҷрон) (6 ҷумодиулаввал / 25 октябр). Издивоҷи ҳазрати Усмон бо ҳазрати Умму Кулсум (ҷумодиуссонӣ).

3/625 Издивоҷи Расулуллоҳ бо ҳазрати Ҳафса (шаъбон / январ). Таваллуди ҳазрати Ҳасан (15 рамазон / 1 март).

Ғазваи Уҳуд (7 шаввол, шанбе / 23 март). Ғазваи Ҳамроуласад (16 шаввол / 1 апрел).

4/625 Аз ҷониби Абдуллоҳ ибни Унайс кушта шудани Холид ибни Суфён (5 муҳаррам / 17 июн). Воқеаи Раҷиъ (сафар / июл). Воқеаи Биъри Маъуна (19 сафар / 31 июл). Ғазваи Бани Назир (рабеъулаввал / август). Қисман ҳаром шудани май (рабеъулаввал / август–сентябр). Вафоти Абдуллоҳ, писари ҳазрати Усмон ва ҳазрати Руқайя (ҷумодиулаввал / октябр). Вафоти Абӯсалама (23 ҷумодиуссонӣ / 30 ноябр).

4/626 Таваллуди ҳазрати Ҳусайн (5 шаъбон / 10 январ). Издивоҷи Расулуллоҳ бо ҳазрати Зайнаб бинти Хузайма (рамазон). Издивоҷи Расулуллоҳ бо ҳазрати Умму Салама (охири моҳи шаввол / аввали апрел). Вафоти Фотима бинти Асад. Ғазваи Бадри суғро (1 зулқаъда / 4 апрел).

5/626 Ғазваи Зотурриқоъ (10 муҳаррам / 11 июн). Ғазваи Думатулҷандал (25 рабеъулаввал / 24 август). Вафоти модари мо ҳазрати Зайнаб бинти Хузайма (рабеъуссонӣ / сентябр). Ба Мадина омадани ҳайъати Бани Музайна, ки мусалмон шуда буданд (раҷаб / декабр). Ғазваи Мурайсиъ (Бани Мусталиқ) (2 шаъбон / 27 декабр). Ба ҳазрати Оиша туҳмат задан. Нозил шудани ояти таяммум.

5/627 Издивоҷи Расулуллоҳ бо ҳазрати Ҷувайрия бинти Ҳорис (шаъбон). Ғазваи Хандақ (Аҳзоб) (шаввол / март). Ғазваи Бани Қурайза (23 зулқаъда / 15 апрел). Издивоҷи Расулуллоҳ бо ҳазрати Зайнаб бинти Ҷаҳш (1 зулқаъда / 24 март). Издивоҷи Расулуллоҳ бо ҳазрати Райҳона бинти Амр (зулҳиҷҷа / апрел–май).

6/627 Сарияи Муҳаммад ибни Маслама ба Қурто (10 муҳаррам / 1 июн). Сарияи ҳазрати Алӣ ба сӯи Бани Саъд ибни Бакр дар Фадак. Ғазваи Ғоба (Зиқарад) (2 рабеъулаввал / 22 июл). Сарияи Ғамр (рабеъулаввал). Сарияи Муҳаммад ибни Маслама ба Зулқасса (рабеъулаввал). Сарияи Абӯубайда ибни Ҷарроҳ ба Зулқасса (рабеъуссонӣ / сентябр). Сарияи Зайд ибни Ҳориса ба Ҷамум (рабеъуссонӣ).

Ғазваи Бани Лиҳён (1 ҷумодиулаввал / 18 сентябр). Сарияи иктишофии Зайд ибни Ҳориса ба Ийс (ҷумодиулаввал). Мусалмон шудани Абулос. Сарияи Зайд ибни Ҳориса ба Тараф (ҷумодиуссонӣ / октябр–ноябр). Сарияи Зайд ибни Ҳориса ба Водилқуро (раҷаб / ноябр–декабр). Сафари Зайд ибни Ҳориса ба Шом / корвони тиҷоратӣ (раҷаб). Сарияи Абдурраҳмон ибни Авф ба Думатулҷандал (шаъбон / декабр). Сарияи Зайд ибни Ҳориса ба Мадян (шаъбон / декабр). Сарияи ҳазрати Алӣ ба Фадак (шаъбон / декабр).

6/628 Сарияи Зайд ибни Ҳориса ба сӯи Умму Қирфа (рамазон / январ). Хушксолӣ дар Мадина ва барои дуои борон берун баромадан (рамазон). Сарияи Абдуллоҳ ибни Атик ба сӯи Абӯрофеъ (рамазон / январ). Сарияи иктишофии Абдуллоҳ ибни Равоҳа ба Хайбар (рамазон / феврал). Сарияи Абдуллоҳ ибни Равоҳа ба сӯи Усайр ибни Зорим (шаввол / феврал). Сарияи Курз ибни Ҷобири Фиҳрӣ (зулқаъда / март). Сафари умра (2 зулқаъда / 14 март). Байъати Ризвон (зулқаъда / март–апрел). Сулҳи Ҳудайбия (зулҳиҷҷа / апрел). Нозил шудани сураи Фатҳ. Ба Мадина омадан ва мусалмон шудани ҳайъатҳои Бани Хузоа, Бани Аслам ва Бани Хушанӣ. Қатъиян ҳаром шудани май. Ба пойгаи шутур ва асп иҷозат додани Расулуллоҳ.

6, 7/628 Аз ҷониби Расулуллоҳ фиристода шудани мактубҳои даъват ба ислом (рӯзҳои охири моҳи зулҳиҷҷа – аввали моҳи муҳаррам / май).

7/628 Сарияи Зайд ибни Ҳориса ба Ҳисмо (ҷумодиуссонӣ). Мусалмон шудани Асҳама, Наҷошии Ҳабашистон. Баста шудани ақди никоҳи ҳазрати Умму Ҳабиба. Аз ҷониби Муқавқиси Миср ба назди Расулуллоҳ фиристода шудани Мория. Вафоти Умму Румон разияллоҳу анҳо, модари модари мо ҳазрати Оиша. Мусалмон шудани Абулос ва аз нав ба никоҳи Зайнаб, духтари Расулуллоҳ, даромаданаш (муҳаррам / май). Ғазваи Хайбар (охири муҳаррам – сафар / июн). Кӯшиши Зайнаб бинти Ҳорис барои заҳр додани Расулуллоҳ. Ба Мадина баргаштани боқимондаи асҳобе, ки ба Ҳабашистон ҳиҷрат карда буданд (сафар). Ба Мадина омадани ашъариён ва ба шарафи асҳоби киром будан мушарраф шудани онҳо.

Лайлатуттаърис: бо асҳобаш ба хоб рафтан ва барои намози бомдод бархоста натавонистани Расулуллоҳ. Издивоҷи Расулуллоҳ бо ҳазрати Умму Ҳабиба. Вафоти Сувайба, модари ширии Расулуллоҳ. Мусалмон шудани Бозон, ҳокими Яман (ҷумодиулаввал / сентябр). Мӯъҷизаи аз уфуқ баргаштани офтоб барои намози асри ҳазрати Алӣ. Ғазваи Водилқуро (ҷумодиуссонӣ / октябр). Издивоҷи Расулуллоҳ бо ҳазрати Сафия бинти Ҳуяй. Сарияи ҳазрати Умар ба Турба (шаъбон / декабр). Сарияи ҳазрати Абӯбакр ба Наҷд (шаъбон / декабр). Сарияи Башир ибни Саъди Ансорӣ ба Фадак / Бани Мурра (шаъбон / декабр).

7/629 Сарияи Ғолиб ибни Абдуллоҳи Лайсӣ ба Майфаъа (рамазон / январ). Сарияи Башир ибни Саъди Ансорӣ ба Ҷиноб (шаввол / феврал). Сафари Умратул-қазо (зулқаъда – зулҳиҷҷа / март). Издивоҷи Расулуллоҳ бо Маймуна бинти Ҳорис (зулқаъда / март).

8/629 Вафоти ҳазрати Зайнаб, духтари Расулуллоҳ (сафар). Мусалмон шудани Холид ибни Валид, Амр ибни Ос ва Усмон ибни Талҳа (сафар). Сарияи Ғолиб ибни Абдуллоҳ ба Қудайд (сафар / июн). Сарияи Ғолиб ибни Абдуллоҳ ба Фадак (сафар / июн). Ҷанги Мӯта (ҷумодиулаввал / сентябр). Сарияи Амр ибни Ос ба Зотуссалосил (ҷумодиуссонӣ / октябр). Пас аз шикастани сулҳи Ҳудайбия аз ҷониби қурайшиён барои сулҳ кӯшиш кардани Абӯсуфён.

8/630 Барои фатҳи Макка ба роҳ баромадани Расулуллоҳ (10 рамазон / 1 январ). Фатҳи Макка (20 рамазон, панҷшанбе / 11 январ). Қабри модараш ҳазрати Оминаро дар Абво зиёрат кардани Расулуллоҳ. Шикаста шудани бутҳо. Ғазваи Ҳунайн (11 шаввол / 1 феврал). Бо хоҳари ширии худ Шаймо мулоқот кардани Расулуллоҳ. Ғазваи Тоиф (шаввол / феврал). Дар Ҷиърона тақсим кардани ғаниматҳои Ҳунайн аз ҷониби Расулуллоҳ (5–18 зулқаъда / 24 феврал – 9 март). Умра гузоридани Расулуллоҳ (19 зулқаъда / 10 март). Барои Масҷиди Набавӣ сохта шудани минбари сезина. Таваллуди Иброҳим, писари Расулуллоҳ (зулҳиҷҷа).

9/630 Ба баъзе қабилаҳо фиристода шудани маъмурони закот аз ҷониби Расулуллоҳ (муҳаррам / апрел–май). Сарияи Уяйна ибни Ҳисни Фазорӣ (муҳаррам). Ғазваи Табук (раҷаб / октябр). Сарияи Холид ибни Валид ба Думатулҷандал (раҷаб). Бо амри Расулуллоҳ вайрон карда шудани Масҷиди Зирори мунофиқон. Вафоти Наҷошӣ Асҳама, ҳокими Ҳабашистон (раҷаб / октябр). Сарияи ҳазрати Абӯбакр ба Рамл (шаъбон). Вафоти ҳазрати Умму Кулсум, духтари Расулуллоҳ (шаъбон). Аз ҷониби Расулуллоҳ ба Ҳиракл фиристода шудани мактуби дуюми даъват ба ислом. Санатулвуфуд (Соли элчиён). Мусалмон шудани Каъб ибни Зуҳайр ва ба ӯ ҳадя кардани хирқаи Расулуллоҳ.

9/631 Марги Абдуллоҳ ибни Убай, сардори мунофиқон (зулқаъда). Фарз шудани ҳаҷ. Ба амирии ҳаҷ таъин шудани ҳазрати Абӯбакр (зулқаъда – зулҳиҷҷа / феврал–март). Барои расондани аввали сураи Бароат ба Макка фиристода шудани ҳазрати Алӣ (зулҳиҷҷа / март).

10/631 Сарияи Холид ибни Валид ба сӯи Бани Ҳорис (рабеъулаввал / июн). Сарияи ҳазрати Алӣ ба Яман / Мазҳиҷ (рамазон / декабр). Вафоти Бозон, волии Яман. Мусалмон шудани Фируз, хоҳарзодаи Наҷошӣ. Даъвои паёмбарӣ кардани Мусайламаи Каззоб.

10/632 Вафоти Иброҳим, писари Расулуллоҳ. Ҳаҷҷи видоъ: барои ҳаҷ аз Мадина ҳаракат кардани Расулуллоҳ (25 зулқаъда / 22 феврал). Хутбаи видоъро эрод фармудани Расулуллоҳ (9 зулҳиҷҷа / 7 март). Тавофи видоъ (14 зулҳиҷҷа / 12 март, панҷшанбе). Вафоти ҳазрати Райҳона бинти Амр.

11/632 Аз ҷониби Ҷабраил алайҳиссалом ду бор ба Расулуллоҳ хонда шудани тамоми Қуръони карим. Ба фармондеҳии лашкаре, ки бояд ба Шом равад, таъин шудани Усома ибни Зайд. Оғози дарди сари Расулуллоҳ (26 сафар / 24 май, якшанбе). Шиддат ёфтани таби Расулуллоҳ ва оғози бемории таб (ҳуммо) (27 сафар / 25 май, душанбе). Кушта шудани Асвади Анасӣ, ки даъвои паёмбарӣ дошт (8 рабеъулаввал / 4 июн, панҷшанбе). Аз ҷониби Расулуллоҳ ба имомат гузошта шудани ҳазрати Абӯбакр (8 рабеъулаввал / 4 июн, намози хуфтан).

Охирин намози Расулуллоҳ бо иқтидо ба ҳазрати Абӯбакри Сиддиқ (12 рабеъулаввал, рӯзи душанбе, намози бомдод). Вафоти Расулуллоҳ (12 рабеъулаввал / 8 июн, душанбе, пеш аз нисфирӯзӣ). Ба хилофат интихоб шудани ҳазрати Абӯбакр (12 рабеъулаввал / 8 июн, душанбе). Дафни Расулуллоҳ дар нисфи шабе, ки сешанберо ба чоршанбе мепайвандад (шаби чоршанбе). Бар сари муртадон фиристода шудани Усома ибни Зайд (16 рабеъулаввал / 12 июн, ҷумъа). Бо пирӯзӣ баргаштани Усома ибни Зайд (26 рабеъуссонӣ / 22 июл, сешанбе).